छगू जीवन तःहाकः लाकि चछि ?

छगू संसार बिइ हँ जितः वं । वं क्यनाबिइ हँ जितः, वं गुलि मतिना याना धकाः । वया जिजक जिउसा जितः जीवन हे बिइमास्ति वः । जि आः फ्वसा ह्वयेधुन, जि आः थः हे सतः जुइधुन धकाः सिइकं नं वं थःत जिगु पालिक्वय् तयाबिइ धाल । थौं थःगु तुति भागियाके मखनीगु खःसा द्यवं ला आशिर्वाद बिइमखु, वं जितः जीवन बिइ हँ, वयात उकिया पलेसा छुं म्वाः हँ ।
जिं तप्यंक हे धयागु, छं सिउ , जिकय् आः छन्त बिइगु छुं हे मदयेधुंकल । फगत नां तकं बिइफइमखु जिं । जिगु नां नं जिगु मखयेधुंकल ।
व तं चाल । धाल, छिं छिकय् छुं माल धइगु हे गबलय् दु धकाः । जिं जीवनय् व्यापार यायेगु त्वःतेधुन । छिं जितः छु बियादिल वं छिं हे मसिउ, जिं धाये नं मसः । जितः जीवन बियादीगु दु, छिं । उकिया बदलाय् जिं छु बिइ धया, व ला ग्व, छुं हे मखु, लनास्वये तकं मछाःसे च्वं ।
— म्वाः मदुगु खँ ल्हानाच्वनी । थन जीवन बियां ला जितः जि बिइपिं लुइकेमफु जिं । खँ जक का छंगु ।
०००
— तं चायादीमखुसा छता खँ धाये ।
– छता छु झिता हे धा ।
– धाथें ला जितः…
– धाथें छु ?
– धाथें ला जितः छिलिसे छचा नापं च्वनेमास्ति वः । नापं ब्यले याये, नापं छकः कःसिइ च्वनाः नगुत स्वये, अले नापं हे । जिं छितः उलिथुलि मदयेक मतिना बिइ । सुथय् सुद्र्य लूगु नापं च्वनाः स्वयाः जक बाये । म्हाः धयादिइमते । जीवनय् छकः म्वायेबियादिसँ जितः ।
– लात्ति मिसा, तमं ह्वानाक्क च्यात जि । गबलें लिफः स्वये मछायेक ब्वह बिइथें च्वंगु खः जितः । तर ग्व, छु जुल जितः । जिगु नुगलय् नं स्वां ह्वल । जितः नं छकः म्वाये मास्तिवल ।
धाथें व गज्याःगु म्वायेगु जुइ, गनं गज्याःगु नं कालबिल मदु, समाजया नियम कानून मदु, स्वार्थया लेस तक नं मदु । छुं दुसा व हे मतिना जक । बिइ जक सःगु कायेगु मसःगु मतिना । म्वानाः म्वानाः म्वायेगात धायेधुनम्ह जितः छकः छन्हुया निंतिं सां म्वानास्वयेमास्ति वल । काचाक्क छुं जुयाः जि सि हे सित धाःसा छुन्हु ला म्वानानि जि धकाः म्वाये मखनीबलय् थःगु मन त्याकेगु थाय् लुइके थें जुल ।
०००
खँ जूकथं जि वयाथाय् वया । वयागु थ्व हिसिचा दूगु शहर । पुलांगु सभ्यताया केन्द्र अले आधुनिकताया प्रतिनिधि । थ्व शहरया दकलय् बांलाःगु होटलया सुट क्वथाय् । व व जिगु छगू संसार दयेकेत वं हे ल्ययाः बुक यानातःगु थ्व होटल । जि थ्यंबलय् व होटलया लुखाय् दनाः जितः लसकुस यानाच्वन, म्हुतुसिइ न्हिला अले मिखाय् मतिना ब्वयाः । मतिनाया मतिना जक दु अन, मेगु छुं मदु । खः खनी, संसारय् मतिना अझं म्वानाच्वंगु दनि । मतिना कायेभाःमखंपिन्सं मतिनाया मृत्युघोषणा यानाजुइ, स्वार्थया लासाय् सुयातं थसःपाकेगु हे मतिना धाइपिन्सं मतिना धइगु स्वार्थ धकाः त्यप तज्याःगु बाखं दयेकाजुइ ।
०००
छझाः व लिसे वयागु शहरय् चाःहिला । वं क्यनाच्वन — थ्व दरवार, थ्व छेँ, थ्व द्यःगः, थ्व सतः, थ्व हिति, थ्व फलेचा धकाः । जिं स्वःस्वःथाय् मतिना जक खनाच्वना । मतिनाया मतिना जक । भय्बियाच्वंगु मतिना । द्यःया छ्यनय् छानातःगु स्वां नं मतिना, द्यःया कपालय् किनाच्वंगु सिन्हः नं मतिना । जिं वयागु ख्वाः जक खनाच्वना, जिं वयागु ख्वालय् हे दरवार, छेँ, द्यःगः, सतः, हिति, स्वां व सिन्हः खनाच्वना । वयागु मिखां धयाच्वंगु दु, मतिनाया देय्या सकतां स्वयेत छम्ह मतिना जुयाः वयागु लिक्क जि दं वःगु दु । व उकिं लय्ताः, तसकं लय्ताः ।
००० फाइभ स्टार होटलया डिनर । वं नयेत स्यानिटाइजरं ल्हाः यचुकल । जिं तप्यंक नयाबिया । वया चम्चां तिङतिङ सनाच्वन । वयात ल्हातिं न धकाः भाय् याना । वं नं चम्चा बस्वात । ल्हातिं हे नल, सवाः वयेक । नःम्हस्या वया मिखा जिकय् जक । नये सिधयेकाः जिपिं छझाः व सुनसानगु ततःबालागु लँय् चाःहिउवना । गन गन वना, अन अन व हिसि मदुम्ह तिमिला च्येवा काःवयाच्वन ।
०००
लिहाँ वयाः होटलया जिमिगु क्वथा न्हयःने थ्यन । लुखाय् न्ह्यःने छकः निम्हं दिना, थवं थवय् ख्वाः स्वया, मिखाय् स्वया, मिखाय् ब्वना । खः निम्हं तयार दु, मतिनाय् म्वायेत तयार ।
०००
दुने क्वथाया चुकू जक च्वनेवं वं क्यनाबिल, व गुलि प्याःचाः धकाः । जि इतःमितः कन । उमिमछि मतिनां जिं सुयाकें मखनानि । जितः साल, ल्ह्वन, त्वन वं । सासः हे ल्हाये थाकुल, जितः त्वने मगाःनि वया । जिकय् गुलि दु जुइ । वं जितः त्वनाः जितः हे तृप्त यात ।
मिखां मिखा ज्वन, ल्हातिं ल्हाः ज्वन, सासलं सासः ज्वन । छम्हस्या सासःया क्वाः मेम्हस्या मतिना जुयाबिल । न्हाचः त्वनागु श्याम्पेनं छतिं मकायेकू, मिखाया भासं कायेकल । निम्हं याग्लाप्याग्ला । निम्हं सिइत्यंपिं थें । सिनाः म्वायेत्यंपिं थें, मतिना दुबिना वल निम्हसिकेंं ।
झ्यालं दुहां वयाच्वंगु तिमिलाया जः तनावन । पिने तिमिलायात नं सुपाचं भुन जुइ । कि व नं मछालाः सुपाय्या दुने सूवन जुइ । वयात नं प्याःचाःया अनुभव जुल ला । वया नं जिमिथें झूचाये मन जुल ला । मतिना काये मखंतले सागर ला प्याःचानाच्वनी । दक्वसित लः बियाच्वनीम्ह खुसि नं ल्वहँ ल्वहँतय् तज्याक्क न्याःवनी, हाः वनी, फू वनी । ल्वहँया मतिना लखं जक सिउ । ल्वहँया कापिइ कापिइ थःत न्ह्यंकःवनी, तृप्त जूवनी लः । जि थें ।
क्वानाः, च्यानाः पुनाच्वंपिं जिपिं । पिनें ख्वाउँक फय् दुहाँ वल । गुलि पिनें ख्वाउँ वल, उलि हे दुनें क्वाः जिपिं । मतिनाया मि धइगु हे अज्याःगु । का, पिने ला छकलं द्यः न्यात, गारांगुरुं । सर्गः हे थरथर खात । गुलि सह यायेमफुगु जुइ उमि जिमिगु मतिना । हुनुहुनुं फय् सन, झ्वारारारां वा गात, तिमिला गन सूवन मसिउ । झ्यालं लः चिचाः वल, जिमिगु क्वाःगु म्हय् तुं जूवल । क्वाःथाय् क्वाक्कं, ख्वाउँथाय् ख्वाउँकं जिपिं बाः वनाच्वना । च्वापुइ दनदन च्यानाच्वनीपिन्त व छफुति निफुति लखं छुं यायेफुसा । ह्वानाह्वाना च्याच्यांं थौं जिपिं नौ जुयाच्वना, झौ जुयाच्वना ।
झ्यालं फय् वयाच्वन । चाःगु झ्याःया धकिं फाताफाता सनाच्वन, गबलें फय् त्याइ, फारापुक्क धकिं घ््वानाहइ । गबलें धकिं बल्लाइ, इक्कधिक्क मजुइक दनाच्वनी, फय् हिमीचाइ, फक्व बल पिकयाः धकिंयात घ्वाइ । धकिं ह्यामि जुया मुसुमुसु जक न्हिलाः फय्या तमं जाःगु मतिना फयाच्वनी । फसं धकिंयात, धकिमं फय्यात । गबलय् फय्या त्यानुइ, गबलें धकिं न्यली । निम्हं झू चाल, निम्हं तृप्त जुल । निम्हं निखे चातावानाः द्यना । चछिं छन्ह्यः जिमि । वलिसे जि, जिलिसे व । कसिक्क घय्पुनातल वं जितः, जिं नं मत्वःता । नकतिनि का म्वायेसःगु जिमिसं । बछि जीवनय् गबलें मम्वाना, नकतिनि म्वाये सल जिमिसं । छगू जीवन तःहाकः लाकि चछि ? मतिनाया घौ पलख नं छगू जीवन स्वयाः तहाकः जुइ । गुम्हं कालबिलया नागपासय् तक्यनी, गुलिस्या दान्छि बियाः पाय्म्वः कायेगु दाउ, गुलिं बिया धाधां घय्सुनाच्वनी । काइपिंया काइपिनिगु थ्व संसारय् बिइम्हस्या सासःया क्वाः थियाहे जक ला खःनि म्वायेगु धइगु । मेगु ला दक्व सिनाः सिनाः सनाः वनाच्वंपिं जक । थःगु हे सनाः । छकः थुलि म्वानाः जिं आः म्वाःम्ह जुइधुन ।
सुथय्या ह्याउँगु निभाः चाःगु झ्यालं तय्जु धाःवल । चछि झ्याः चाः, अन हे च्वनाः स्वयाच्वन जुइ व तिमिलां । छु खन जुइ वं । गुलि कुतुकुतु नुगः मुइकाच्वन जुइ वं । वन जुइ नि व नं ला चछि म्वायेगु हुनि मालेत । गन लुइ धकाः व । मालां लुइगु जूसा जि तिन्हिनय् तक थथे छफुति छफुति वा मगाःगु बन्जर जुयाः म्वानाच्वनेमाली ला ?
जिगु चकंंंंगु ल्हाःयात फ्वंगा दयेकाः फुंफुं द्यनाच्वन व । कुकुरुक्क म्ह कयेकुंकाः । सालुगु सिलःया दुने व व जि । ह्याउँगु निभालं वयागु सिइकातःगु सँ प्वालाक्क थिनाबिल । लइँचा तयातःगु नस्वाः जिगु न्हासय् तक सन्देश जुयाः वल । तीजक खवगु ल्हातिं वयागु कुलिकुलि सँय् छकः पिइत ल्ह्वना, मजिल, वयागु न्ह्यः स्यंके मंमन्त । बाघौ व अप्वः द्यनी, द्यनेबिया वयात । म्वायेबिया वयात । जि नं ला म्हो मम्वाना ।
प्वालाक्क मिखा चाल वया । न्हापां खन वं जिगु ख्वाः, थारान्हूम्ह थें, म्हगसं त्यलाताःम्हथें । पत्याः हे मजू वयात, जि वलिसे चछि दु धकाः । मछाः ख्वालं व ह्याउँनिभाः स्वयाः नं ह्याउँल । सिलः सालाः थःत तपुइत स्वल । व हे सिलखय् जि नं ला दु — जि नं वथें, व नं जिथें हे । जितः न्हापं त्वपुत वं ।
– छ्या । छिं सिउला? गज्याःगु घचायापुसे च्वंगु म्हनाच्वंगु जितः ।
– म्हनाच्वंगु मखु उल्लु मिसा, म्वानाच्वनागु का, झी । छ व जि ।
अले व सुथ न्हापालिपा स्वयाः नं झं प्याचाःगु जुयाबिल ।