फोन मवल !! (छपु लुमन्ति लेख)

मथुरा साय्‌मि

छम्ह पुलांम्ह पासा । कान्छा ।
परिवारय् दक्कय् चीधीम्ह जुयाः हे वयात”कान्छा” धाःगु खः । लिपा कान्छा नामं हे वयात त्वालय् सकसिनं म्हसियावन । नागरिकताय् ला वया आधिकारिक नां मेगु हे दु ।
पासा पासा । छगू हे त्वाः थॅहितिया निम्ह पासापिं जिपिं । ब्वनेगु ज्या स्वयाः नं थःगु पुर्खाया ज्या/ब्ववसायपाखे हे वया ध्यान तक्यंवन । जिं ब्वनावना । माष्टरचा जुया । पासा पासा जूसां निम्ह निपु लॅ लिनावना ।इलय्-ब्यलय् ध्वदुइ । नापनिप नं लाना । दुख-सुखया खॅ फुकं ब्याः । कनेज्यूगुं नं , मज्यूगुं नं ।
निम्हसियां थःथःगु परिवार दत । थः बूगु त्वालं निम्ह निखे छेय् दनाः च्वंवना । व बिज्यासलय् सा , जि पुलां बानेश्वरय् ।
थाय् बाय् हिल । नापलायेगु नं म्हो जुयावन । इलय्-ब्यलय् जिं स्वयाः उप्वः वं हे फोन यानाहइ । म्हं फु मफुया खॅ ब्याइ । उगुंथुगुं खॅ जुइ । ध्वदुक्क नापलायेगु ज्या छता द्वलय् स्वलय् छकः धयाथे जक जूवन ।
ई फःपुला वंलिसे उमेरं निम्हसितं जेष्ठ नागरिक धयाहल ।बुरा नं जूगु हे खत । मचाखाचात नं निम्हसियां ब्वलने धुंकल । वया ब्यवसाय मस्तसें कत्तात । जितः नं थःगु जागिरं अवकाश प्राप्त जुल । निम्ह निखेर । थःथःगु हे संसार । नापलायेगु उस्त मजुल ।
वया फोन इलय्-ब्यलय् वया हे च्वनी । म्हं फु मफुया खॅ ब्यायवं वं धयाहइ– झी नं बुरा हे जुल हला । छन्हु गबले लाइ । झी नं फ्यात्त धायेक वनी ।”
वं थःगु खॅ ककं फलाना ला मन्त नि , धिस्काना नं मन्त धकाः धयाहै । न्यनाच्वने । गय् जुयाः मन्त छु जुयाः मन्त खॅ बृतान्त कना हे च्वनी । कंगु खॅ जिं न्यनांच्वने । सु सु मन्त धैगु खॅ उप्वलं वयापाखें हे जिं सियाच्वनी । न भाषाया खॅ गबलें जुइ , न राजनीतिया हे ।
कोरोना ल्वय् नेपालय् नं ब्वयावल । हालल् हुलल् जुल । द्वलंद्वः मनू ल्वचं थियाः अस्पताल अस्पताल ब्वाकेमाल । गुम्हं लंकाः छेय् हल । अन हे मदुपिं लाःलाःथाय् यनाः जः परिवारपिं अन्तिम संस्कार सिधयेकाः लिहाॅवल ।
फोन वयेव म्हं फु मफुया खॅ हे मल्हासे वं करपिं मफुगु , अस्पतालय् तच्वयाच्वंगु , सिनाः पशुपती यंगु खॅ कनेगु यानाहल । न्यने मयःसां न्यनाच्वने । खॅ त्वाःल्हाये नं मयःम्ह जि ।
लिपा जूलिसे मेगु छुं हे खॅ मल्हासे थः म्हस्यूपिं पासाभाइपि , जःला खःलापिं मदुगुया धलः ( रिपोर्टिङ्) हे याये थे कनाहयेगु वया बानि जुल । दः न्यानाच्वने हे यः मजुल । अयनं जिं बिरोध मयाना । पासायात छाय् तम्वयेके धै थे ।
धुच्चापतिं फोन याना हया च्वनीम्ह पासाया फोन मवःगु धाःसा आः ला भचा यक्व हे दत । छाय् मवल । वास्ता मयाना । फोन-फिन मवःसां हे जिल धैथे जुल । सी-सायगु खबर जक नं छु न्यना च्वनेगु धैथे मतिइ ।
× × ×
तःन्हु लिपा । मोबाइल चायेकेवं पासाया फोटो छपाः धच्याक ब्वयातःगु खना । समबेदना । झसंग वन । का, व ला मन्त खनी । फोन मवःगु उकिं सकाः जुयाच्वन !!
……… !!!