आज प्रथम त्रियान प्रज्ञा सम्मेलन हुँदै – लुम्बिनी बौद्ध विश्वविद्यालय १७औं वार्षिकोत्सब विशेष

प्रविन महर्जन ,लुम्बिनी / लुम्बिनी बौद्ध विश्वविद्यालय १७ औं बार्षिकोत्सवको उपलक्ष्यमा ४ दिने कार्यक्रम अन्तर्गत मंसीर १४ गते विभिन्न कार्यक्रमहरु आयोजना गरिएको छ । यसैक्रममा स्वास्थ्य शिविर तथा  “शान्ति, समझदारी तथा दिगो विकासका लागि पत्रकारिता” विषयक  कार्यशाला गोष्ठी कार्यक्रम पनि आयोजना गरिएको छ ।
स्वास्थ्य शिविर शहिद गंगालाल राष्ट्रिय हृदयरोग केन्द्र तथा हर्ट टु हर्ट नेपालको समन्वयमा विश्वविद्यालयले आयोजना गरेको थियो । शिविरमा केन्द्रका विशेषज्ञ चिकित्सकहरुद्वारा लुम्बिनीका विभिन्न विहार, गुम्बाका भिक्षु गुरुमां, लामागुरुहरु, विश्वविद्यालयका सदस्यहरु लगायत स्थानियहरु बासिन्दाको निःशुल्क स्वास्थ्य जाँच गरिएको थियो ।
अर्को महत्वपूर्ण कार्यक्रमका रुपमा “शान्ति समझदारी तथा दिगो विकासका लागि पत्रकारिता” विषयक कार्यशाला गोष्ठीमा विश्वविद्यालयका उपकुलपति प्रा. डा. हृदयरत्न बज्राचार्यद्वारा बौद्ध दृष्टिकोणमा विश्व शान्ति र सम्बृद्धि विषयमा सहजीकरण गर्नुभएको थियो ।
कार्यक्रमका मूख्य प्रशिक्षक लामो समय पत्रकारिता गरिसक्नु भएका कुन्दन अर्याल हुनुहुन्थ्यो ।
विश्वविद्यालयका अन्तर्राष्ट्रिय संयोजक संजिव हुमागाईंद्वारा पत्रकारिताको संरचनामा आएको परिवर्तन र विश्वसनीयता बारे सहजीकरण गर्नुभएको थियो ।
विश्वविद्यालयलये आफ्नो १७ औं बार्षिकोत्सवको उपलक्ष्यमा आज मंसिर १५ गते बुधबार  बुद्ध धर्मका तीनै यानलाई लिएर “प्रथम त्रियान प्रज्ञा सम्मेलन” हुँने कार्यक्रम रहेको छ । साथै बुद्ध मूर्ति प्रतिष्ठापन तथा दीप प्रज्वलन कार्यक्रम पनि गरिने छ ।  यसैगरी भोलि मंसिर १६ गते राष्ट्रपति विद्यादेवी भण्डारीको प्रमुख आतिथ्यमा मूल कार्यक्रम हुनेछ भने  पुस्तकालय भवन उद्घाटन लगायतका कार्यक्रम पनि गरिने भएको छ ।