नां मदुगु स्वापू -चिबाखं

रिता महर्जन

ईलचनय् बहनीसिया झिता: ई क्यने धुंकल अय्‌नं अमृताया न्ह्यः मवःनि। पिने तसकं वा वयाच्वंगु दु। उकें झ्यालं नं सिचुसे च्वंक सिरिसिरि फय् वयाच्वन। ईलचंया तिकतिक सलं वया न्ह्यः झन बिस्युं वनाच्वन। वं न्ह्यः वयेकेत कुतः यानाच्वन ।
उब्लय् मोबाइलया नोटिफिकेशनया सः वल । अमृताया तं वल । न्ह्यः मवयाः च्वंबलय् हाकनं मोबाइलया गं न्यायेमा:गु का…. धाधां अमृता मोबाइल स्वीच अफ यायेत ल्हातय् मोबाइल काःबलय् हाकनं मोबाइलया गं न्यात । सु ख: थ्व ? धका: मोबाइल चायेका स्वल । मोबाइलय् म्यासेज खन ।

– हेल्लो अमृता, छु दु छंगु खबर ? म्हं फु ला ?
अमृताया मिखा थपाय् ग्व: जुल । दं दँ दत लुमना मवः । थौं आपुलखं समीरया म्यासेज वल । पलख ला छुं धाये मखु धका: अमृता सुम्क च्वन । हानं समीरया म्यासेज वल ।

– अमृता जिगु म्यासेज स्वयाः नं छाय् लिस: मबिया ? जि खनाः तं वः ला कि छु ?
अमृताया तं वः, अय्‌नं छुं मखु थें याना: लिस: बिल ।

– यक्व हे दँ लिपा म्यासेज यात। थौं गथे लुमना वल छं ?
– जिं ल्वःमंकागु हे गुब्लय् दु ?। झीगु व frnship फुक्क जितः लुमंनि ।
अमृतां धाल
– तर जि फुक्क ल्वःमने धुंकल। जिकेय् छंगु छुं लुमन्ति मन्त ।
अनंलि समीरं थ: व अमृताया न्हापाया लुमन्ति लुमंकेत पुलागुं खँ कनाहल। अमृताया व छुं लुमंके मंमदु । हाकनं समीरं धाल

– छ जिगु न्हापायाम्ह गथे पासा ख: आ: नं उथें जिम्ह पासा ख: । जिगु नुगलय् सदां छ हे च्वनाच्वनी ।
समीरया थ्व खँ न्यनाः अमृतायात नुगलय् मुलु सू थें सुयाबिल । दं दँ न्हापा जाकिया फिग्व: वान्छ्वये थें वान्छ्वयाः ल्वःमंकूम्ह व समीर । अय्‌नं वयागु नुगलय् जि दु हं !
समीरं थ: इहिपा: याना: निम्ह मस्त व थ: कलाःनापं थौंतक नं तसकं सुखी, सन्तोष व गुब्लें ल्वाये म्वा:गु खँ अमृतायात कन । समीरं थ:गु जीवन सुथां ला:गु बाखं नं अमृतायात कना हयाच्वन ।
अमृताया मतिइ लुल

– कलाःनापं सुखीम्ह मनुखं थौं आपुलुखं छाय् दं दँ लिपा जितः लुमंकाः म्यासेज यात !
अमृतां समीरयात छुं मधा: सिवाय् “लिबात द्यने न्हिं” धका: अमृतां मोबाइल स्वीच अफ यानाबिल।