कोरोना सहिद

रिता महर्जन

क्वँय् छकूया निंतिं खिचात ल्वाइ थें पदया निंतिं नं झीगु देशया नेतात घनघोरं वं वैत क्वथुलाः वं वैत क्वथुलाः ल्वानाच्वन। इमित कोरोनाया छुं वास्ता मदु, कोरोना ल्वचं क:पिन्त वासः मदु, अक्सिजन मदु अय्‌नं इपिं नेतातय्‌त छुं वास्ता हे मदु, द हे मदु। बुखँ थजा:गु जक न्ह्याथाय् स्वःसां ! जि ला आजित जुल थुपिं नेतात खनाः ।
लकडाउनं यानाः छेँय् च्वंच्वनागु नं लच्छि हे दइन । उकें थौं छकः पिहां वनेमाल धैगु मती तयाः पिहां वना । छेँय् लिकसं च्वंगु चुकय् पला: तयेथाय् मदयेक मनूत खना । थजा:गु लकडाउनया इलय् गनं व:पिं थुलिमछि मनूत ? हाकनं थुपिं जिन्दावाद व मुर्दावाद धका: छाय् नारा थ्वयेका च्वन ? जिं छुं मथुल ।
लिकसं दुम्ह छम्ह ततायात न्यना “थन छु जुयाच्वंगु तता छुकेया आन्दोलन ख: थ्व ? थजा:गु कोरोनाया अवस्थाय् नं ?” वं लिस: बिल- छु जूगु धाये ग्व ? झीगु नेपा: देशय् कोरोनां तसकं ख्यात। उकें थ्व कोरोनायात याकनं न्हंकाबिइमाल धका: सरकारयात न्यंकेत कोरोना विरुद्धय् जुलुस जुयाच्वंगु का ।” जि ला व मिसाया खँ न्यनाः अजू चाल का, सुनां मखंम्ह की थ्व, हानं विकसित देशं तक नं थ्व कोरोनायात न्हंके मफुनि, झीगु देशं धाःसा कोरोना न्हंकेत कोरोना बिरुद्धय् जुलुस हं । ओहोहो…….जि ला अजू चाल । अय्‌नं जि नं न्ह्यःने च्वनाः कोरोना विरुद्धय् जुयाच्वंगु आन्दोलन न्ह्याइपुक्क स्वयाच्वना।
कोरोनां यानाः नेतातय् राजनैतिक कासा गुलि न्ह्याइपुक्क म्हिताच्वंबलय् जनतातय्‌सं वहे कोरोनाया विरुद्धय् आन्दोलन यात हं का……. का फसाद जुइन धयाभनं नेतातय्‌सं कोरोना विरुद्धय् आन्दोलन याइपिन्त मुइकी । लिपा छुं जुयाः घा:पा जुल वा मनू सित धाःसा इमित कोरोना सहिद घोषणा यायेगु जुइ धका: छकलं माथिको आदेश वल धका: आन्दोलन हे तितरबितर जुइक टियर ग्याँस त्व:तल । जि ला न्ह्यःने च्वनाः न्ह्याइपुक्क स्वयाच्वनाम्ह छकलं इतःमितः कन । गन वने गुथाय् बिस्युं वने थें जुल।
अय्‌नं व थासं लाकां हे त्वःफिक छेँय् पाखे स्वयाः ब्वाँय् वया । जि लुफिं हानाः दल। उब्लय् छम्ह मनू जिगु ल्यूने खनाः वं धाल- का….. मैं आ: कोरोना सहिद जुइत तयार जु । जिगु म्हं छम्हं ग्यानां चःति चःति जुल। जिं अनुनय बिनय याना, म्हां म्हां जि कोरोना सहिद जुइ म्हां । बरु आवंलि जि छेँय् थासं पिंहा वये मखुत धा धां वाथाइथि दनाः ब्वाँय् वनेत स्वयां ला थ:गु लासाय् धकाः लानाच्वन ! जिगु म्हुतुं स: पिज्वल धत्तेरिका ……… !