ल्हुतिपुन्हि व नामसंगीती गाथा

प्रा. डा. बज्रराज शाक्य
चैत पुन्ही ,ल्हुति पुन्हि । ल्हुती म्व: ल्हुयाः जामाच्वय् चीभाः दर्शन याःवनीगु न्हि खः ।।
थौया न्हि भगबान बुद्धं धान्यकतक पर्बतय् देब मनुस्य यक्ष किन्नर आदि पिनिगु उपस्थिती बज्रपानी बोधिसत्वया अध्येशनाय स्वकःगु धर्म प्रबचनया शिलशिलाय् तन्त्रया खँ कना बिज्याःगु जुल । थ्व हे उपदेशया शिलशिलाय् मायाजाल तन्त्र अन्तर्गत लानाच्वंगु नामसंगिती गाथा नं कना बिज्याःगु जुल ।
नामसंगिती मुख्य विषय बुद्धयागु संबोधी ज्ञानयात खुगू ब्वथलाः खुगू ज्ञान कथं कना तःगु जुयाच्वन । खुगू ज्ञानया नां निम्न अनुसार जुल ।
बज्रधातु ज्ञान , धर्मधातु ज्ञान , आदर्श ज्ञान , प्रत्यवेक्षना ज्ञान , समता ज्ञान,कृृत्यानुष्ठान धैम्ह ज्ञान ।
नामसंगिती बज्रसत्व धैम् नामसंगिती धैम्ह मन्जुश्री धैम्ह बुद्ध धैम्ह छम्ह हे कथं कनातःगु जुयाच्वन । मन्जुश्रीया हे ८१२ गुणकथं मन्जुश्रीया नांयात १६० पद्यय् स्लोक बद्ध यानाः लुमंके अःपुइक गाथाय् ब्यक्त यानातःगु जुल ।
बज्रधातु ज्ञान मेगु न्यागू ज्ञानया समस्तिगत ज्ञान अर्थात बज्रसत्वया सम्यक बोधी ज्ञान जुल । धर्मधातु ज्ञान मोह मदयेकाः चित्त व चित्त अनुभव यानाच्वंगु फुक प्रपंच आकाश थें शून्य खः धैगु सत्य कनाः संसार म्हसीकाः दुखं मुक्त जुयेगु ज्ञान जुल ।
आदर्श ज्ञान धैगु झीगु चित्त न्हाय्‌कं थें थःगु छुं हे स्वभाव मदु तर थुके पिनेयागु फुक प्रतिबिम्बित जुइफैगु जुयाच्वन । प्रतिबिम्बित जुयाच्वंगु धैगु थःगु अस्तित्व मदुगु अनित्यगु धकाः सीकाः उकी आशक्त मजुइकेगु प्रतिकृया मयासे क्रोध पिमकायेगु । क्रोधया थासय् थ्व ज्ञान करुणा उत्पन्न याना बी । भयंकर रुप प्रकट यानाः क्लेशयात ख्याना छ्वइ अथबा मदयेका छ्वइ ।
समता ज्ञान चित रत्न थें उकेया न्ह्यःने फुक्क प्रपंच बराबर खः सम खः । तःधं चिधं धैगु द्वन्द मदु अहंकार मदयेकाः सम भाव मैत्री भाब दयेकाः सकसित क्षय मजुइगु सुख दयेका बी ।
प्रत्यवेक्षना ज्ञान ठोस बस्तुयात विश्लेषण यानाः कुचा कुचा ब्वथलाः बस्तुयागु रुप धैगु मनयागु सृष्टि  जक खः धाथें दुगु मखु धैगु सत्य क्यनाः थयःगु भ्रमय् झीपिं आशक्त जुया च्वने मज्युगु धाइ । थ्व ज्ञानं लोभ मदयेकाः त्याग याये फयेका बी । थ्व ज्ञान संसार गथे जुयाः दै गथे याःसा मदया वनी धैगु खँ स्पष्ट याना बी ।
कृत्यानुष्ठान ज्ञान झीगु कर्म संस्कारयात भिंकाः झीगु कुशल कर्म सिद्ध यानाबी । ईर्ष्या डाहा मदयेकाः हर्ष मुदिता दयेका बी । झीगु कर्म संस्कार हानं मेगु जन्म काःवने म्वायेक क्षय याइगु ज्ञान बियाः झीत शुद्ध यानाः दुख मदुगु अबस्थाय् थ्यंका बी ।
थ्व न्यागू ज्ञानया संयुक्त ज्ञान खः बज्रसत्वयागु सम्यक संबोधी ज्ञान जुल। थौं सकसिनं थन लानाः दुखं मुक्त जुइ फयेमा ।