बिस्का जात्रा गर्न अदालतले पनि ढोका खोलिदियो , जात्रा नरोक्न सर्वोच्चको अन्तरिम आदेश जारी

काठमाडौं / भक्तपुरमा मनाइने राष्ट्रिय पर्व बिस्का जात्रा नरोक्न अन्तरिम आदेश जारी गरिएको छ । स्थानीय बासिन्दा एवं अधिवक्ता राजकुमार सुवालले दायर गरेको रिट निवेदनमाथि सुनुवाइ गर्दै न्यायाधीश पुरुषोत्तम भण्डारीको एकल इजलासले जात्रा रोक्ने निर्णय कार्यान्वयन नगर्न जिल्ला प्रशासन कार्यालय भक्तपुरलाई आदेश दिएको हो। सर्वोच्चले उक्त निर्णय गर्नुपर्नाको कारणसमेत पेस गर्न भनेको छ।
प्रमुख जिल्ला अधिकारी प्रेमप्रसाद भट्टराईको अध्यक्षतामा आइतबार बसेको कोभिड १९ संकट व्यवस्थापन सञ्चालन केन्द्रले कोरोना संक्रमण बढेको भन्दै जात्रा गर्न नदिने निर्णय गरेको थियो।
उक्त निर्णयपछि भक्तपुरको नेवार समुदाय आफ्नो क्षेत्रको जात्रा गर्नु आफ्नो मौलिक अधिकार भएको भन्दै जात्रा मनाउन पाउनुपर्ने माग सहित आन्दोलनमै उत्रिएका थिए ।विरोधका हिजो उनीहरूले जिल्ला प्रशासन कार्यालयमा सांस्कृतिक बाजागाजासहित धर्ना समेत दिएका थिए । राजनीतिक आन्दोलन जुलुस गर्दा कोरोनाको डर नहुने तर स्थानीय समुदाय भेला भई मनाउने पर्वमा कोरोनाको बहाना देखाई राज्यले जात्रापर्व भाँड्न खोजेको भन्दै स्थानीय बासिन्दा सरकारप्रति क्रुद्ध बनेका थिए ।
जिल्ला प्रशासन कार्यालयको उक्त निर्णयविरुद्ध मंगलबार परेको रिट निवेदनमाथि सुनुवाइ गर्दै सर्वोच्चले जात्रा सञ्चालन गर्न भनेको हो।