“येँ देय् म्हसीके” सार्वजनिक याःगु लसताया खँ

येँ/ येँ मनपापाखें थुगु दँनिसें थःगु क्षेत्रया दक्वं ब्वनेकुथिइ १ गू तगिंनिसें ८ तक ब्वंकेगु नितिं पाठ्यक्रम दयेकेगु झ्वलय् १ निसें ४ गू तगिंतकया पाठ्यक्रम “येँ देय् म्हसीके” सार्वजनिक याःगु अतिकं लसताया खँ जूगु व थुकियात फुक्क ख्यलं च्वछानाः सुभाय् देछाना हयाच्वंगु दु । थ्व हे झ्वलय् नेवाः पत्रकार राष्ट्यि दबू पाखें नं लसता प्वंकुगु दु । दबुलिं छगू प्रेस बिज्ञप्ति पिथनाः थथे सुभाय् देछाःगु खः ।
उगु पतिइ “आखः सयेकेगु जूसा मां भासं ब्वङ दिसँ ।” १३७ दँ न्ह्यः थुगु धर्तीइ पलाः तयाः राणकालीन व इलय् मांभाय् शिक्षाया महत्वया सः तयादीम्ह, हलिमय् लोकंह्वाःगु बाखंयात नेवाः भासं भाय् हिलाः “इसपं दयेकातःगु बाखं” पिथनादीम्ह नेपालभाषाया प्यंगः थौं मध्ये छगः थां मास्टर जगतसुन्दर मल्लं तयादीगु सः व म्हगसः थौं पूवनाच्वंगु अनुभव समाजं याःगु दु ।” धैगु खँ उल्लेख यासें येँ मनपापाखें थुगु दँनिसें थःगु क्षेत्रया दक्वं ब्वनेकुथिइ १ गू तगिंनिसें ८ तक ब्वंकेगु नितिं पाठ्यक्रम दयेकेगु झ्वलय् १ निसें ४ गू तगिंतकया पाठ्यक्रम “येँ देय् म्हसीके” सार्वजनिक याःगु अतिकं लसताया खँ खः । उत्साहया खँ खः । नेपालभाषाया थुगु पाठ्यक्रम दयेकेगु ज्याय् योगदान यानादीपिन्त पत्रकार राष्ट्रिय दबूपाखें यक्वः यक्वः सुभाय् नं देछानागु जुल । अझ थुकी थुगु दबुलिं सकल आदिवासी जनजाति, मधेसी पत्रकारपिनिगु साथ कयाः ल्ह्वनावयाच्वंगु सः देय्या दकले न्हापांम्ह मातृभाषी पत्रकार धर्मादित्य धर्माचार्यया जीवन व कर्मया खँ नं दुथ्याःगुलिं नं नेवाः पत्रकारपिनिगु नुगः लसतां जाःगु खँ नं न्ह्यथनातःगु दु ।
नेवाः भाय् ब्वनाः छु दइ ? ल्हानाः छु दइ धइगु न्ह्यसः लुयाच्वंगु इलय् थुगु हे ज्याया नितिं जनशक्तिया नितिं इनाप जूगुपाखें ब्वलंगु गौरवं जाःगु लकस नं लुमंके । झी नेवाःतय्गु भविष्य धइगु हे नेवाः भाये्या भविष्य खःसा थुकिया बल्लाःगु आशा धइगु शिक्षाय् नेवाः भाय् हे खः । अझ नेवाः भाय् संरक्षण व प्रचार प्रसारया नितिं प्रत्यक्ष अप्रत्यक्ष भूमिका म्हिताच्वंगु नेपालभाषाया संचारख्यःया आधारतकं नेपालभाषा शिक्षा हे खः । सकभनं लसता ह्वःगु व लँ क्यंगु थुगु ज्याया नितिं येँ मनपाया मेयर विद्यासुन्दर शाक्य, उपमेयर हरिप्रभा खड्गी श्रेष्ठ, मनपाया शहरी योजना आयोग, शिक्षा विभाग, पाठ्यक्रम समिति, सकल महानगर परिवार व थुगु निर्णय उत्साहं कार्यान्वयन यानादीपिं सकल ब्वनेकुथियात पत्रकार राष्ट्रिय दबू परिवारपाखें दुनुगलंनिसें सुभाय् देछाःसें ५ निसें ८ गू तगिंया पाठ्य सफू नं याकनं पिदनेमा धइगु भलसा नं प्वंकुसें लोकं ययेकूगु निर्णयलिसें येँ मनपाया थजाःगु पलाः मेमेगु स्थानीय तहया नितिं नं हःपा जुइगु खँ उल्लेख नं न्हयथनातःगु दु ।