जिगु झ्वाता !!

मथुरा सायमि                                                                             भोताहितीच्वंगु ललित कला क्याम्पसलिसे जि तसकं सती । न्हापा व छगू पाठशाला जक । जुध्द कला पाठशाला ।
SLC मयानिपिं न्ह्याम्हं चित्रकला व मूर्तिकला ब्वने च्वये सयकेत अन वनी । ब्वनी । कला बिकासया लॅपुइ बुलुहुॅ बुलुहुॅ ज्या याना वयाच्वंगु छगू शैक्षिक संस्था । अन जिं न्हापां पलाः तः वनागु बि.सं.२०१२  सालय् । SLC या जाॅच। चित्रकला जिगु छगू optional बिषय । व जाॅच बीत जि व भवनय् वनागु । जाॅच बियागु । पास नं जुल हे ।
लिपा M.A यानागु २०२५ सालय् ।  २०२६ सालय् व क्याम्पसय् हिल ।
क्याम्पसया फुक्क ब्यबस्था जुल । मानबिकि (Humanities) अन्तर्गतया पढाइ चालु जुल । अंग्रेजी बिषय ब्वंकीम्ह प्राध्यापक छम्ह नं अन माःगु जुयाच्वन । अन्तरबार्ताय् ल्वानाः जिं व थाय् कायेफत । २०२६ सालंनिसें जि अनया हे छम्ह अंग्रेजी बिषयया प्राध्यापक जुयाः ज्या याये खन । जिगु जीवनय् अनं लुमंकेबहःगु हिलासू वयांच्वन ।
मूल बिषय चित्रकला , मूर्तिकला व संगीत कला हे जूसां नियमकथं अनिवार्य रूपय् अंग्रेजी व नेपाली नं ब्वने-ब्वंके माः । जि अंग्रेजी बिषयया प्राध्यापक।
चित्रकला व मूर्तिकलाया practical class जुइबले अन छम्ह मोडल नं माः । सु दु वयात हे फ्यतुकाः क्लाश चलय् याइ । सुं मदैबले असनय् वनाः ज्यामीत ब्वना हयाः फ्यतुकी । चित्रकला क्लाशय् वयात स्वस्वं मस्तसें चित्र की , मूर्तिकक्षाय् वयात स्वस्वं वया छ्यों दयकी , चायागु । मोडल माले थाकु । ज्याला वःसां ज्या मदयक मसंसे च्वंच्वने थाकु । हेकाहेकाः मोडल माला हयमाः ।
अन्तिम प्यदॅय् ब्वनीपिं Sculpture या बिद्यार्थीतयगु ज्या बांलाः जू । चित्रकलाय् स्वयाः मूर्तिकलाय् जिगु नं ध्यान वन । जिगु नं छ्यों छगः दयके दु सा व झ्लाता थें ल्यनाच्वनी । थः सिना वनीबले नं जि धयाम्ह मनू गय् च्वं धयागु सीकेत मनूतसें व मूर्ति स्वःवइ । थ्व ला लिपाया लागी मू मदुगु चीज जुइ । सीधुंका लिपा थुकिं नं मनू अमर जुयाच्वनी ।
धात्थें मस्तयत थ्व खॅ धया । सकलें लयताल । जितः मोडल यानाः फ्यतुकेगु अले जिगु हे मूर्ति कीत क्लाशया सकलें बिद्यार्थीत लालायित जुल ।
छकः जि हे च्वनाबिया । च्याम्हति बिद्यार्थीत दु । सकसिनं छपाखं जिगु छ्यों छगः चायागु दयकल । व उमिगु परीक्षा हे खनी । प्यन्हु बित । ज्या जुयाच्वंथाय् जिं धया , ” दकलय् बांलाःगु छगः छ्यों जितः हे कायेगु । जिगु हे छेय् यनेगु । ”
उमिसं धाल, ” जिउ सर, चीफयाके छकः न्यनाः यनादिसॅ ।”
ज्या सिधल । स्वम्हसिगु ज्या बांलाः । छम्ह ला दुरूष्ट हे बां लू । स्वक्वस्यां ‘ मथुरा सर ‘ धाः । दः व हे यल । सिधयव उकी हाकुगु रंगं paint यानाः नं तैयार यानाबिल । क्याम्पस चीफं नं यनेगु अनुमति बिल । झ्यातु । यने मछिं । मोटर साइकलय् जि । ह्वःताः चूलाइबले ट्याक्सी तयाः छेय् हयेगु मती । अन हे निं क्वथाय् बैठकय् दराजया द्यःने ब्वया तया । स्वक्वस्यां बांलाः धाः । जिगु आकृति बांलाक हे वः । जि लुदं ।
सुनां सुनां थः म्वानाच्वंगु जीवन कालय् थःगु मूर्ति छेय् दुत यने मज्यू धाल । जिं वास्ता मयाना । छन्हु छिनीबले छेय् यने धकाः अन हे ब्वयातया । अथें अथें ।
धाधामधां ई वन । बि.सं. २०६१ सालय् जिं अनिवार्य अवकास कया । क्याम्पस वने म्वाःल । मूर्ति अन हे थानाच्वन । ह्वःताः चूलाःगु गबसं मजुल ।
छन्हु मुर्ति हे ज्वना वनेगु मतिं भोताहितिपाखे स्वयावना । निपु स्वाहाने गयवं अफिस क्वथा थ्यन । सुं ध्वमदू । क्वथाय् सुं मदु । पलख अथें फ्यतुना । दराज अनया अन हे दु , उकी थनातैगु जिगु मूर्ति मदु । सुनानं स्यू मधाः । गन यन । मसिल । लिपा वये धैगु मतिं सुतुसुतुं लिहाॅ वया ।
बिसं. २०७२ सालय् तःभुखाय् ब्वल । अथें हे पुलांगु छेय् । भवन ज्याय् लगय् मजुइक स्यन धाल । छन्हु भोताहिति थ्यंबले जिगु मूर्ति दैतिनि ला छू छु धकाः स्वःवना । अफिसय् मदुसां व मूर्ति गनं ध्याक्वय् क्वलापय् दइतिनि जुइ धयागु मती। कलेजया ध्वाखां दुहाॅ वना। गन । अन ला छेय् छखां पियाः सुच्चुक माथं वंकातल । अप्पा छपा नं ल्यं मन्त । आः अन न्हूगु हे छेय् दनीगु धाल ।
छुं मदुगु थासय् दः गन स्वये गन स्वये जुल । स्वीन्यादॅ स्वीन्यादॅ तक थःगु छेय् थें थतक्वत जुयाच्वनागु व भवन , गन पियाछ्वत । दॅ दॅ आखः ब्वंका च्वनागु व कक्षा क्वथात पियाः गन वाये यन । स्वयेगु अन छुं हे ल्यनाच्वंगु मन्त । जिगु नुगः काॅइइइइ मिनावल । मतिंमतिं न्यनाच्वन , ” ग्व जिगु मूर्ति ? ग्व जिगु झ्वाता ??