अभिनय नं याइपिं निर्देशक

विजयरत्न असंबरे

आराध्यलक्ष्मी खडगीयात नेवाः फिल्मख्यलय् राइजिङ्ग स्टारया रुपय् कयातःगु दु । वयक मय्जु छम्ह प्रतिभाशाली कलाकार खः । अभिनय प्रतिभाया नापनापं नृत्य प्रतिभा नं धिसिलाम्ह आराध्यं आपालं शर्ट फिल्म , म्युजिक भिडियो या नापनापं “लिबाय् धुंका” नांयागु नेवाः फिल्मय् हिरोइन् जुया नं म्हिते धुंकल । थःगु प्रतिभा न्ह्यब्वयेगु ज्याय् न्ह्यनेलाना च्वंम्ह आराध्यलक्ष्मी छम्ह डान्स टिचर नं खः अले थीथी स्टेज प्रोग्राम , म्युजिक भिडियो व फिल्मय् नं कोरियोग्राफर जुया ज्या याना वया च्वंम्ह खःसा लिपांगु ईलय् वयक मयजुं थःगु पलाः म्युजिक भिडियोया निर्देशनपाखे नं न्ह्याकुगु दु । छुं ई तिनि न्ह्य आराध्यलक्ष्मीया निर्देशनय् पिदंगु म्युजिक भिडियो “जमाना मभिंस्व”यात आपासिनं तारीफ हे यात ।
छम्ह हिरोइन्या रुपय् आराध्यलक्ष्मी खड्गीयात नेवाः कलाकारिता ख्यलय् पलाः न्ह्याकेत ग्वाहाली याम्ह राजेशमान सिं नेवाः फिल्मख्यःया छम्ह स्यल्लाम्ह निर्देशक खः । वयकभाजुया निर्देशनय् “हिसिमदु”, “चन्द्रमान”, “लिबाय् धुंका” लगायतया नेवाः फिल्मया नापनापं आपालं शर्टफिल्म , म्युजिक भिडियो पिदने धुंकल । थथे निर्देशनय् पलाः क्वातुके धुंकुम्ह राजेशमान सिंह छम्ह निर्देशक जक मखसे अभिनयपाखे. नुगः क्वसाम्ह कलाकःमि खः ।
म्युजिक भिडियो ख्यलय् डाईरेक्टर जुया पलाः न्ह्याका च्वंम्ह सुरज नापित नं एक्टिङ्गपाखे नुगः क्वसाम्ह खः । आपालं म्युजिक भिडियोया निर्देशनयाये धुंकुम्ह सुरज नापितं म्युजिक भिडियोय् मोडल जुया अभिनय याःगु दुसाः आः नेवाः फिल्म“आसकुति” व खस नेपाली फिल्म, “वन वे” लगायतया हिरो जुया म्हिता च्वंगु दु । अभिनयपाखे क्वसापिं निर्देशक आः जक खनेदया वःगु मखु न्हापानिसें दु ।
नेपालभाषाया संकिपा ख्यलय् छम्ह ज्वमदुम्ह व्यक्तित्व धइम्ह रामशेखर नकःमि खः । वयकया म्हसिकाजक च्वयेगु खःसां थुलि थासं मगाः । उकिं थन वयक छम्ह निर्देशक जुया नं अभिनय पाखे नुगः नुगः क्वसाम्ह खः धइगु पक्षयात जक कुले । नेपाल टेलिभिजनय् दकले न्हापां पिदंगु नेवाः फिल्म “बाह्र बजे” रामशेखर नकःमिं हे दयेकूगु खः । वयकया डाईरेक्शनय् “झोकमनिम्ह”, “न्हिसुतु” थेंज्यागु नेवाः सिरीयल नं पिदंगु दुसा “चकना” नांयागु छगू फिल्मया नं निर्देशक खः वयक । अले वयक थःम्हेसिनं हे निर्देशन याःगु फिल्मय् अभिनय याइम्ह एक्टर नं खः। थुकथं वयक छम्ह थ्व ख्यःया न्ह्यलुवा खः । अले वयकया हे पलाःख्वाँय् लिना न्ह्यां वना च्वंपिं खः मेपिं ।
थन नेवाः फिल्म ख्यलय् थम्हेसियागु निर्देशनय्् थःम्हं नं छगू भुमिकाय् अभिनय याइपिं आपालं दु । “सिलु” व “राजमति” धुंका दिपा कयाच्वंगु नेवाः संकिपा ख्यलय् बुलुहँु खनेदयेक वःगु स्वंगु नेवाः फिल्म धइगु चाण्डालिका, याँमिखा व सुभाय् खः। थ्वया दथुइ पिदंगु प्यंगु फिल्म धइगु “चरित्र”, “चिपनिपः”, “निपाः ख्वापा”, “न्हिला न्हिला हुँ” खः । थ्व प्यंगु मध्ये “निपा ख्वाःपा” व “न्हिला न्हिला हुँ”या डाईरेक्टर श्याम कृष्ण श्रेष्ठ खः । अले थ्व निगुलिं फिल्मय् वयक भाजुं मेन रोलय् अभिनय यानातःगु दु । “चरित्र” फिल्मया डाईरेक्टर पवन जोशी खः । पवन जोशी नं छम्ह बांलाम्ह एक्टर खः । तर वयक थम्हेसियागु निर्देशनय् सिबें मेपिनिगु फिल्मय् म्हितेगुलि नुगः क्वसाम्ह एक्टर खः ।
“चाण्डालिका”या डाईरेक्टर मनिष श्रेष्ठं थःगु फिल्मय् मू भुमिका म्हिता तःगु दुसा “याँमिखा”य् रवि डंगोल नं निर्देशक कम एक्टरया रुपय् खनेदयेक वःम्ह खः । “सुभाय्” फिल्मय् आर्यम नकःमि नं डाईरेक्टर एक्टरया रुपय् खनेदयेक वःम्ह खः । थुपिं मध्ये आर्यम नकःमि आपालं फिल्म दयेके धुंकूगु दुसाः थम्हेसिनं डाइरेक्शन याःगु फिल्मय् थः नं म्हिता च्वंगु दु । रवि डंगोलं “याँमिखा” लिपा “कुलांगार”, “व मिसा”, “वल वल फसिक्वाः” , “टेम्पो चालक”या निर्देशन यात । अले थुकी मध्ये छगूलि त्वता मेगु दक्वः फिल्मय् थःहे म्हिता च्वंगु दु ।
नेवाः फिल्म ख्यलय् डाईरेक्टरया रुपय् राज शाक्यया बिस्कं हे म्हसिका दु । अले वयक भाजु नं थःगु फिल्मय् थःहे नं मेन रोलय् म्हितिम्ह डाईरक्टर एक्टर खः । विशेषयाना नेगेटिभ रोल म्हितेगु वयकया विशेषता खः । अभिनय याये न्ह्याःम्ह छम्ह मेम्ह निर्देशक सुरेन्द्र तुलाधर नं खः । याकः म्ह्याय् नांयागु नेवाः फिल्मया च्वमि , सह निर्देशक व कलाकारया रुपय् फिल्म यात्रा न्ह्याकुम्ह सुरेन्द्र तुलाधरं निर्देशन याःगु आपालं फिल्मय् थम्हेसिनं नं अभिनय यागु दुसा आः वयकया निर्देशनय् पिदनिगु आसकुति व लुँयागु तक्मा नांयागु निगु फिल्मय् वयक भाजुया अभिनय स्वयेदइगु खःला मख्ुला सिमदुनि ।
“हसना”, “पियाच्वना”, “ए… जि यम्ह” फिल्मया डाईरेक्टर स्वतन्त्र संसार महर्जन खः । अले थुकी मध्ये निगू फिल्मय् थःहे मेन हिरो नं जुयाम्हितल । छम्ह एक्टरया रुपय् थःगु पलाः क्वातुकेगु तातुना न्ह्याः वनाच्वंम्ह स्वतन्त्र संसार महर्जनया न्हापांगु फिल्म “नि�वःस्वां” खः । उकी व छम्ह एक्टर जक खः । निर्देशक मखु । थ्व फिल्मया निर्देशकला अमृतमान महर्जन खः । अले अमृतमान महर्जनं लिपा मतिना, द्वपंमि सु व स्वय्नगु थेंज्याःगु फिल्म व उलिंचा बाखं थुलिंचा थेंज्याःगु सिरीयल नं दयेकल । अले उगु सिरीयलय् मेन रोल नं थःम्हेसिनं हे म्हितल ।
“मतिनाया कलि” फिल्मया डाइरेक्टर प्रकाशराज मानन्धर खः । अले थ्व फिल्मय् प्रकाशराज थःम्हेसिनं नं छगू रोल याना तःगु दु । मेपिं डाइरेक्टर तयेसं थें वयकलं नं थुके नेगेटिभ रोल हे म्हिता तःगु दु । थ्वहे “मतिनाया कलि”या छम्ह हिरो विष्णु सक्वं दयेकूगु छगू फिल्म “माया रे रत्न” या डाइरेक्टर कम एक्टरया भाला क्वबिउगु खःसा लिपा “लय्” दयेकूबले धाःसा निर्देशनया जिम्मा आर्यम नकःमियात बिल । थः एक्टरजक जुया ज्याः यात ।
अमृतचन्द्र श्रेष्ठ शुरुइ एक्टर जक जुइगु मतितया वःम्ह खः । लिपा थःहे निर्देशक नं जुल । एक्टिंगया इच्छा दनिसां वयकलं थौंकन्हे विशेष याना निर्देशनय् अप्वः ध्यान बिया च्वंगु दु । अमृतचन्द्रं थेंहेंतुं रामकृष्ण खड्गी नं थम्हेसित निर्देशकया रुपय् न्ह्यःने हयेगु कुतः याना च्वंम्ह खः । मखु धइगु खःसा वयक नं छम्ह धिसिलाम्ह एक्टर खः । तर “पटाचारा”व “कृषा गौतमी” थेंज्याःगु च्वछाये बहगु फिल्म दयेके धुंका वयक छगू ईलय् छगू हे पक्षय् जक ल्हातयेगु पक्षय् च्वनाच्वंगु दु ।
रविन्द्र शाही भाजु नं शुरुइ एक्टरया रुपय् खनेदयेक वःम्ह खः । “झस्का” फिल्मय् वयकलं मेन रोल नं म्हितल । तर लिपा वना “थःम्हं म्हूगु गाः” थेंज्यागु स्यल्लागु फिल्म डाईरेक्शन यात । अले उकी छगू रोल नं म्हितल । थन थथे डाईरेक्टर थःहे एक्टर जूपिनिगु बारे च्वयेगु खःसा बचाधंगु सफु हे तयार जुइ । उकीं थनला अज्यापिं छु छुं संकिपामि तय्गु बारे दसु कुलेगु जक कुतः जुयाच्वंगु खः । थ्व कुतलय् त्वफिके मजिउगु छगू नां वास शाहीया नां खः । ग्वंगः क्वसः, लुंयाम्ह झंग निसें कया ब्याहा याये म्हां , एकसे एक , पागलपन थेंज्याःगु आपालं फिल्मया डाईरेक्टर वासु शाही नं थम्हेसिनं दयेकूगु गुलिखे फिल्मय् थःहे मेन रोलय् म्हितातःगु दु । थुकथं डाइरेक्टर जुया नं फिल्मय् म्हितिम्ह मेम्ह छम्ह सुरेश स्थापित नं खः । “फय्गं” सिरीयलय् वयकया नितां ख्यःया प्रतिभा स्वयेदु । सुरेश स्थापितया “ल्हा हुस्लुं प्वा फुस्लुं” पिदने धुंकल । अथेहेतुं “बाखंचा” सिरीयलय् थुकथं हे डाईरेक्शन व एक्टिंग नितां याम्ह धइम्ह राजु स्यस्य खः। वयक भाजु “याकः म्ह्याय्” फिल्मया निर्देशक नं खः । अले उगु फिल्मय् छगू रोल नं यानातःगु दु ।
रत्नकाजी महर्जन लूनिभां दयेकूगु “मुद्दा” नेवाः भाषाया ख्यलय् बिस्कं हे महत्वं जाःगु फिल्मया रुपय् कयातःगु दु । खय्तला वयक भाजुं थ्व फिल्मय् छुं नं रोलय् एक्टिंग याना तःगु मदु । तर वयक नं अभिनयपाखे नुगः क्वसाम्ह संकिपामि खः । नेवाः फिल्म ख्यलय् न्हापांम्ह मिसाम्ह डाईरेक्टरया रुपय् थःगु न्हाय् धस्वाकेत ताःलाम्ह सुनिता राजभण्डारीं आर्यम नकःमिलिसे छुं छुं फिल्मय् मंका निर्देशक जुया ज्याः याःगु दुसा लिपा वना “ट्वेल्भ डेज” नांयागु छगू फिल्म नं दयेकल । अथेहेतुं मेम्ह मिसा निर्देशक लुनिभा तुलाधर मय्जुं नं “कर्कश” नांयागु खस नेपाली फिल्मया नापनापं मेगु छगू निगु फिल्मय् नं एक्टिंग याना तःगु दु । तर विशेष याना डकुमेण्ट्री फिल्मय् ल्हाः न्ह्याम्ह लुनिभा मय्जु आः तक थम्हेसिनं दयेकूगु फिल्मय् थःम्हेसिनं हे एक्टिंग याःगु धाःसा मदुनि । आपालं फिल्मय् सह निर्देशक जुया ज्या याये धुंकुम्ह रवि महर्जन थेंहेतुं थ्व ख्यःया इमर्जिङ्ग टेलेण्ट सबिन शाक्य नं सह निर्देशन या नापनापं अभिनयपाखे नुगः क्वसाम्ह ल्याय्म्ह खः ।
आः लिपांगु ईलय् वया सुरेश खडगी नं अभिनयपाखें फिल्म निर्देशनय् पलाः न्ह्याकुम्ह कलाकःमि खः । वयकया निर्देशनय् छगु शर्ट फिल्म “मोहनी नखः” पिदने धुंकल । आः याकनं हे “वन वे” नांयागु खस नेपाली फिल्म पिदनेत्यंगु दु । अथेहेतुं रवि राजोपाध्याय नांयाम्ह छम्ह पुलांम्ह फिल्मकःमि नं अभिनयपाखे नुगः क्वसाम्ह निर्देशक खः । वयकया निर्देशनय् छुं ई न्ह्यः “मोहनी वल” नांयागु छगु शर्ट फिल्म पिहाँ वल ।
पुलांपिं कलाकारय् पल्पसा डंगोलं दृष्टि नांयागु खँय् भाय्या सिरियल लगायतया मेमेगु नं निर्देशन यानादिलसा आः ” ब्या यानागु लच्छि मदुनि ” यानादीगु दु । नांजाम्ह मेकअप आर्टिस्ट सनम कुमार श्रेष्ठ अले मेम्ह छम्ह नं नांजाम्ह मेकअप आर्टिस्ट भोगेन्द्र मानन्धर नं ” थ्वला ग्यानापु स्टायल” या निर्देशक जुउम्ह कलाकार खःसा सुनिता राजभण्डारी नं फिल्म निर्देशन यानादीम्ह कलाकार खः ।