नाप हे मलायेवं !

                                   माणिकरत्न शाक्य
पासा जुइगु धैगु नं तसकं अजु चायापुसें च्वं, न्हापा न्हापा जूसा स्कूलय्  क्याम्पसय् आखः ब्वनापिं पासापिं नाप जक पासा जइगु ।
सुं गुम्हेसिया तापाक्क चाह्यू वनाबले, अथेहे तापाक्क वनाः ज्याः याःवना बले नं पासा जुल धाःगु न्यना । गुलिं गुलिं सिया ला त्वाय् नं चिना वल हँ धाःगु नं न्यना । तर थौं २१ औं शताब्दीइ थ्यंवले विज्ञानया यक्व हे विकास जुल । मोवाइल, इन्टरनेट, नापं फेसबुक, मेसेन्जर, ह्वाटस्अप थें जाःगु एप्लीकेसनत वःबले ला पासा जुइगु तरिका हे हिला वन । थथे हे विज्ञानया विकासलिसें २१ औं शताब्दीइ  जि नं छम्ह पासा जुल, रितु नापं
रितु सु खः जिं मस्यु, गन च्वनीम्ह खः? छु याइम्ह खः? जिं मस्यू । तर मात्र फेसबुकया माध्यमं व छम्ह च्वयेगु प्रतिभा दुम्ह ब्यक्तित्व खः
धका जिं सिइका । वयागु च्वसां पिज्वगु भावना जित यल, उकिं जिं वयागु च्वसुलिइ प्रतिक्रिया बिया । व सुभाय् बियाहल । जिं थः च्वये
मसःगुलिं वयाके सयेका कया । धात्थे वयागुहे प्रेरणां यानां धायेमाः जि नं छपु निपु वाखं च्वयेगु कुतः याना । थथे जुजुं व नाप जिगु मित्रता स्वात ।
रितु नाप जि पासा जूगु तसकं अजुचायापुसे च्वं । अध्यात्मिक ख्यलय्    थुज्व:गु मित्रतायात Karmic relation धाइ ।     थथे धाइगु न्हापाया जन्मय्यानावःगु कर्मया लिच्वः धाःगु खः । थौकन्हे थुज्वःगु मित्रताया श्रेय आधुनिक विज्ञानयात विइमाः ।   न त जिं वयात प्रत्यक्ष नाप लानागु दु   न त  वं हे जित नापला:गु दु । अयनं मेसेन्जरया माध्यमं पासा जुल ।         अत्यन्त शुद्ध चित्तं मित्रता जूवन गथेकि पुखुलिइ ह्वःगु तुयुगु पलेस्वां थें, पलेस्वांया हलय् थानाच्वंगु निर्लिप्तगु लःथे । लिपा थ्व मित्रताया भावना थुलि क्वातुक्क जुलकि मेसेन्जरय् छकः खँ मल्हासे न्हयःमवःथें तकं जुल । गुवलें गुवलें ला शायद रितुपाखें मेसेज  वइला धैगु आश जुयाच्वनीगु । जि वहे आशय् पिया च्वनेगु । थथे जुजुं न्हि छक: मेसेज यानाः खँ ल्हायेगु वानी जुल ।
थथेहे छन्हु जि बहनी मोवाइल चार्जय् तयाः अफिसया दक्वं  ज्या सिधयेके धका सनाच्वना । जिगु मोबाइल  धण्टी वल,
काचाकाचां मोबाइलय् स्वया । छाय् धा:सा व रितुया मेेेसेज वइगु ई खः । तर मेम्ह पासायागु जुयाच्वन ।                             हाकनं मोवाइल अन हे तया ज्या याना । हाकनं पलख लिपा घण्टी वल । जित मतिइ लुल आःला थ्व अवश्य नं रितुयागु हे  जुइमा धका: स्वया, तर मखु । मन
भःचा क्वतुंथे जुल । जि थःगु ज्या छगु सिधयेकेमाःगु लिं हाकनं ज्या याना । तर मन धाःसा रितुयागु मेेेसेेज वइला वइला धैगु जक
आस जुयाच्वन ।
जिगु ज्या दक्वं सिधल । घडी स्वय वहनीसिया १० वजे जुइधुंकल । जिगु मन मनं धाल थौं ला लिवायेधुंकल । जिं नं मेसेेेज यायेमफुत ।
रितुं नं जितः ल्वःमंकल थें च्वन । मेसेन्जर स्वया, रितुया छु मेेेेसेज वयाच्वंगु नं मदु । मन निराश जुल । मेसेन्जर बन्द याना फेसबुक चायेका । सररर स्वयायंका जि झसंग वन । छम्हसिनं पोष्ट यानातःगु खन । थौं न्हिनेसिया ४ वजे च्वमि मयजु रितुया ह्दयगति बन्द जुया: दिवंगत जुयादीगुलि हार्दिक श्रद्धाञ्जली देछाया च्वना ।
थ्व धात्थे खःला धकाः काचाकाचां क्वथिइक स्वया । फेसबुकय् पोष्ट यानातःगु फोटो स्वया । खः वहे खः रितु, जि पासा । गुम्ह नापं जिं
फेसबुकया माध्यमं, मेसेन्जरया माध्यमं पासा दयेका । तर छकः नाप हे मलाःसे मित्रतां दिपाः काल । जिगु मित्रता वहे       इन्टरनेटय् जुल, इन्टरनेटय् जक लिकुन । जि अत्यन्त भावविभोर जुल ।                                                         मिखां हाःगु ख्ववि मोवाइलय् च्वंगु फोटोय् लात ।