सवा: – चिबाखं

रिता महर्जन

त:दँ लिपा । जिं वैत नापलात, लँय् । न्हिलाः न्वतुया। वं नं न्वतुल। वैगु ख्वालय् छतिं न्हिलासू मखना। छखें ला जि अजूचाल। छम्ह त:मिम्ह मिसालिसे
मतिना इहिपा या:म्ह व।
चिमि जूगु हुनिं जितः त्वःतूम्ह व। ख तु जिके वैत बिई फुगु छुं मदु, दुग्यंगु मतिनासिवे।
नाप लायेवं क्षमा फ्वन, जिके। वं थ:गु खँ प्वंकल – जि मदयेकं वैगु जीवन सुथां लाइ मखु।
वैगु खँ न्यनाः जिगु नुग: पँ म्हुइथें जुल। जिं थ:गु नुग: कसिक्क प्वचिना। वाके मबिया, वैगु न्ह्यने।
न्हापानिसें च्या व समोसा नयेगु पसलय् जिपिं निम्हं दुहांवना। जिमि मतिना जूगु हे थनंनिसें धा:सा पाय्‌छि जुइ। पुलांगु लुमन्ति घानाः च्या व समोसा हे अर्डर याना। थनयागु च्या व समोसाया सवा: हे मेगु। गथे जिमिगु न्हापांगु मतिना।
जिं वैत न्यंका- थौं जितः न्हापाया ई लुमना वयाच्वन। छं जित ल्व:मंकाः च्वतुक्क त्वःतावंसां जिं झीनापं थीथी खँ ल्हांल्हां नयेगु थ्व पस: ल्व:ममंका। थ्व समोसा व च्या ल्व:ममंका।
जिं वैके न्यना – छंगु व जिगु मतिनाया सवा: मदु ला, थ्व समोसा व च्याय्?
जिगु न्ह्यसलं छु याये छु धाये जुल, वैत। थिकेगु क्याफेया कफी व पिज्जाया सवा:दुने तक्यंम्ह व। वं छुं मधासे वहे समोसा व च्या तुलुतुलु जक स्वयाच्वन।
जिं थुलि हे धया, वैत – ई गुलि पाये धुंकल, उबले व आ:। गथे छ व जि। पस:या रूप जक हिल, ईलिसें। थनया थ्व समोसा व च्याया सवा: मपा:नि। उति हे सा:।
जिगु खँ वैत छु लिच्व: लात मस्यु। वैगु कथुं समोसा व च्याया घुतुके मफुत सायद ।                                                   तेबिलय् समोसा व च्या मुसु कयाच्वन।
*