अवसान – चिबाखं

नरेश अमात्य

पृथ्वीनारायण शाह धिनाच्वं स्वया, इ धुतुक्क धुर्का मन मनं धाल,
– अयसा थ्व स्वनिग:या जुजु/लानीत फुक्कं गुम्हं, द्य:त लिसें खंल्हाइपिं, गुम्हं द्य:त लिसे पासा म्हितिपिं, गुम्हं पलेस्वाँया ह:लय पला छिना पुखुलिं पलेस्वाँ थ्व वनीपिं जुया च्वनका मखुला? हुं…..!
वं यक्को बिचा: यात अले बिचा: यायां हे व फिसिक्क न्हिल ।
गुरु मन्त्र लुइकुम्ह थें ।
वं स्वनिग: त्याकिगु निश्चय यात !
वं सिउ ल्वाझ्व: सिवें रणनीति दकलय बल्लाय मा
उकें वं
थ:गु रणनीतिइ,
दकलय न्हापां रणजित मल्लया काय लिसें त्वाय चिन ।
अले थनया बस्तुस्थिति सिका च्वन
– नेवा:त नख: हने मापिं, हनेत त्वने मापिं
– भगवानया परम भक्त
नख: खुन्हु हे नख हना तिल्ल त्वना च्वंगु इलय आक्रमण जुल
पृथ्वीनारायण शाहया तुति गुलि गुलि न्ह्यात
स्वनिग:या महांत लिलि चित,
अन हल्ला खल्ला जुल,
” गोरखा नाथं बरदान ब्युगु हं, गन गन तुति न्ह्यात अन त्यात हं”
आतंक न्यंक न्यन !
यलया जुजुंला आत्म समर्पण हे यात,
थथे स्वनिग: बुत !                                                                °°°°°°°