नेपालभाषा साहित्य सम्मेलन क्वचाल

ख्वप / बिराट नेपालभाषा साहित्य सम्मेलन गुथिं न्यगुक्वःगु बिराट नेपालभाषा साहित्य सम्मेलन बुधवाः ख्वपय् क्वचायेकूगुृ दु ।

हलिं न्यंक न्यनाच्वंगु कोभिड–१९ या महामारीयात ध्यानय् तयाः सामाजिक व भौतिक दुरी कायम यासें मास्क, स्यानिटाइजर अनिवार्य यानाः म्ह्वःजक साहित्यकारपिं मुंकाः सम्मेलनयात निरन्तरता ब्यूगु खँ गुथिया नायः महेन्द्रगोपाल कर्माचार्यं कनादिल ।

दँय्दसंथें थुगुसिइनं नेपालभाषा स्नातकोत्तर तगिंमय् उत्कृष्ट ल्याः हयेत ताःलाम्ह नेपालभाषा केन्द्रीय विभागया कबिन श्रेष्ठयात ‘सुरत्न सिरपाः’ व दां नापं एसईई तगिंमय् उत्कृष्ट ल्याः हयेत ताः लाम्ह जगत सुन्दर ब्वनेकुथिया सुस्मिता राजभण्डारीयात ‘नेपालभाषा पदक’ साहित्यकार गोविन्दमान श्रेष्ठं लःल्हानादीगु खः ।

उगुहे ज्याझ्वलय् ‘ह्याउँबाला’ २८ ल्यानं मूपाहाँ श्रेष्ठं पितब्वज्या यानादीगु खः ।
त्रिरत्न शाक्यं चिनाखँ वाचन याना न्ह्याकूगु उगु सम्मेलनय् रेणु श्रेष्ठं चिबाखं, सुरेश श्रेष्ठं हाइकु, शौरभ शाक्यं चिबाखं, तेज कृष्ण श्रेष्ठं गजल, न्हुच्छेभक्त कवाङं चिबाखं, कुमुद श्रेष्ठं चिबाखं, शरद कसाःनं चिबाखं, धर्मराज राजकर्णिकारं हाइकु, नारद बज्राचार्यं चिनाखँ, राजभाइ जकःमिं चिनाखँ, बसन्त नकःमिं चिनाखँ, नरेन्द्र जोशीं चिनाखँ, हरि गोबिन्द भ्वमिं चिनाखँ, बाबुकाजी सुवालं चिनाखँ व गोविन्द मान श्रेष्ठं चिबाखं ब्वना न्यंकादीगु खः ।

नविन प्रकाश जोशीं न्ह्याकूगु ज्याझ्वलय् पुष्प लाल तिमिलां लसकुस न्वचू तयादिलसा राम गोपालं सुभाय् देछानादीगु खः ।

बुखँ/किपा : अमिर मैया रञ्जित/नेवाः सूचना केन्द्र