अन लाइन सराद्धे !

माणिक उराय्

थुगुसी कोरोना भाइरसं याना: दक्व हे ज्या अनलाइन जुया बिल । मांया ख्वा:स्वयेगु, बौया ख्वा: स्वयेगु, नयेत्वनेया न्यायेमिइ ज्या तक्कं अन लाइन हे जुया बिल । जुजुं आ:ला मोहनिया चालंया सिन्ह तिइगु तकं म्हाइपुस्से च्वना बिल । दँय् छक:नापलाइपिं छेँ ज: पिं नं कोरोनाया ग्या:चिकुं थ:गु हे छेँय् छेँय् कुना बिल । सिन्ह तिइगु तक्कं अन लाइन जुया बिल ।
…….मोहनराज या थुगुसी मोहनी नख: मन्या:। मोहनराजया गुइच्यादँ दुम्ह अजि मदुगु थौं झिंस्वन्हु । घ:सुया श्राद्ध तकं बाज्यां छेंय् बिमज्यासे अनलाइनं हे सिधयेका बिल ।
दक्व ज्या सिधयेका त्यानुम्ह मोहनराज झासु लनेत खाताय् ग्व:तुुल । वया भुसुक्क न्ह्य:वल । अब्लय् म्हगसय् वया मदुम्ह अजि वया: धाल
– ” बाबू मोहन राज, सुथंनिसें जि छुं नये मखंनि, जित: पिण्ड दान मयानाला ? नये पित्यात’ अजिया सुकुचिंगु ,कय्कय् च्वंगु  ख्वा:खना: मोहनराजया दुुख ताल तस्कं माया वन । वं धाल ‘अजि न्हाच: सुथे हे बाज्यां धया बिज्याथें पिण्ड नं अन लाइन हे दान यानागु । आम्कन अजियाथाय् मथ्यंला?’ अजिं माया वंक धया हल ‘ बाबु, आम्कन थें थन मोबाइल, कम्प्युटर , नेट लाइन मदु । अले जित:गनं पिण्ड थ्यनिइ ?’ मोहनराजया झसंग न्ह्यलं चाल । काचा काचा तले वना: बांकी दनिगु जा निग: क:सिइ प:खालय् तया बिल । क्व:छम्ह वया जा नल । मोहनराजया ख्वालय् सन्तुस्तिया उं खने दत ।
माणिक उराय् , लायकू चालं , ने सं ११४० ।