बखुंया गफ्फ् ! छगू न्ह्यैपुगु लुमन्ति !

दिपक तुलाधर

बखुंया गफ्फ् छगू न्ह्यैपुगु लुमन्ति
————-
बखुं लहीगु धयागु नं छगू त:धंगु नशा ख: धयागु खँ सायद बखुंबाज तयसं जक सिइ । गजी, अयला:, जू सिबे नं त:धंगु नशा ख: बखुं लहीगु । बखुं लहिगु थुलि न्ह्यइपु, थुलि भुलेजुइ, थुलि लठ्ठ जुइ, धयां, च्वयां साध्य हे मजू ।

जिपिं मचा बलय् सोजाम्ह पासा छम्ह दु । पासाया नां मचाकाजि । उमेरं जिमि सिबे ५-६दँ थँ । मचाकाजि बखुंया बारे जिमिसिबे अनुभबी । व इलय् जिपिं खुगू तगिमय् ब्वना च्वनागु । मचाकाजिं स्कुल वनेगु बिचय् त्व:तूगु जुया च्वन । मचाकाजी सुथे ७ बजे व सनिलय् ५ बजे असनय् खमुलिइ तया: तरकारी मिइगु । न्हिनय् मचाकाजि बुँइ वनिइ । जिपिं २म्ह ३म्ह सुथे मचाकाजियात तरकारी मिइथाय् पिया च्वनेगु । अले तरकारि म्युम्युं जिमित बखुंया खँ न्यंका च्वनिइ । सनिलय् नं जिपिं स्कुलं लिहाँ वया: असनय् मचाकाजिया तरकारि मिइथाय् व वइ धका: पिया च्वनेगु । मचाकाजिया दिनचर्या सुथे, सनिलय् तरकारी मिइगु, न्हिनय् बुँइ वनेगु । मचाकाजिया बखुं लहीगु बाहेक मेगु रहर मदु । उकें वइके मेगु गफ्फ् यायेगु विषय् मदु । वइके दुगु गफ्फ् बखुं जक ख: । तर जिमित वं सुथे, सनिलय् बखुंया जक गफ्फ् न्यंका च्वनिइ । जिपिं थुलि लठ्ठ जुया: न्यना च्वेनगु ई वंगु हे चाइमखु । तरकारी मिइ सिधलकि व छेँय् लिहाँ वनिइ । गफ् न्यने हे गाइगु मखु । वं जिमित लठ्ठ जुइक गफ्फ् कना च्वनिइ । मचाकाजिया दाजु सिक्क चलाख । मचाकाजियात ज्या याका: थ: हिरो जुया जुइ । सुथ निसें बहनि तक ज्या याना च्वनिम्ह सोजाम्ह मचाकाजियात तरकारी मिया च्वंथाय् हे वया दाजुं गफ्फ् याना च्वन धका: ब्व:बिया थकिइ । जिमिगु कारणं वं बरोबर ब्व: फयेमा: । खास जिमिगु गफं वया तरकारि मिइगु ज्या यात छुं हे पंग: मजू । वं जिमित गफ्फ् नं न्यंका च्वनिइ, तरकारि नं मिया च्वनिइ । जिमिसं न्यना जक च्वनेगु । सुयातं हानी मजू । बरु जिपिं मचाकाजिया ख:मू लिउने च्वना: न्हिंन्हिं गफ् न्यनाच्वनिइगु खना: गुम्ह गुम्हं अजूचा: । मचाकाजिया बखुंया गफ्फय् गुलि नशा दु, जिपिं गुलि लठ्ठ जुया धयागु खँ जिमिसं जक सिउ । मचाकाजिया छेँय् नं बखुं दु, बुइँ नं बखुं दु । वा लयेगु इलय् लया हयागु वा निभालय् पायेमा: । वया वा पाइगु थाय् न:घ:या च्वसं सिगलय् ख: । वालयेगयु इलय् सिग: जायेक द्वंद्वं वा पाना तइ । न्हिनय् पाना त:गु वा, बहनि सुकुलं त्वपइ । अले अन चछि पा: नं च्वनेमा: । बहनि वा पिवा: च्वनेगु जिम्मा नं सुथ-निसें ज्या याइम्ह मचाकाजिया ब्वलय् हे लाइगु । वया दाजु, किजा, केँहेपिं दुसां वं हे जक यक्को ज्या याना च्वनिइ । सोजाम्ह मचाकाजि छुं धाये मस: । बुँज्या धुंका: वया सोंख धयागु हे बखुं जक ख: ।
तरकारि मिइ सिधयेका: व लिहाँ बनिइबलय् जिमित साप म्हाइपु, गथेकि न्ह्यैइपुगु फिल्म क्वचाइबलय् स्वये हे मगा:थेँ जुइगु । थ्व खँ मचाकाजिं नं महसुस या: । उकें व बहनिइ सिगलय् वा पिवा: च्वंवनिइबलय् जिमित नं ब्वना यंकी । सिग: चकंथाय् जूगुलिं बहनि भचा चिकुसे च्वं । वाद्वं त्वपुया तैगु सुकुलिइ च्वनेगु, अले वं जिमित गां भुंका: बखुंया हे गफ्फ् न्यंका तै । न्ह्याको न्यंसा क्वमचा:, न्ह्याको न्यंसा न्ह्येइपु बखुंया गफ्फ् ।

स्कुलय् जिमि स्कुलयाम्ह हे प्रबिन लाल धाम्ह छम्ह पासाया नं बखुं लहिना त:गु खँ सिल । लिपा जिपिं निम्ह स्कुल बसय् नं बखुंया जक गफ्फ् याना च्वनेगु । अले मेपिं पासपिन्सं जिमित “ थुपिं निम्ह नाप लातकि बखुंया जक गफ्फ् याना च्वनिइ ” धका: हायेकी । ख नं ख:, जिमि बखुंया गफ्फ् याये दतकि मेगुलिइ मन मवं ।

चिकंमुगलय् कान्छादाई धाम्ह बुराम्ह छम्ह दु । थ:गु छेँया स्वतँजा: च्वय् कोथाय् वया बखुं मिइगु ज्या । अन बखुं न्याइपिं व मिइपिं बुरा त वया च्वनिइ । इमिगु गफ्फ् न्यनेत नं जिपिं अन यक्को वना । इमिगु गफ्फ् नं सिक्क न्ह्यैइपु । जिपिं इमिगु बखुं गफ्फ् न्यना: लठ्ठ जुया च्वनेगु । बखुंया गफ्फया मज्जा बखुं बाजतयसं जक सिइ ।

थौँ कन्हे मचाकाजि छक: निक: जक नापला: । मचाकाजियाके वहे सोजा पह, व हे साधारण जिन्दगी ल्यं दनि । तर व साप हे सन्टुष्ट सुखी खनेदु । मनय् छुं चिन्ता, दुख:, इर्ष्या अहमता वयाके मदु । जिपिं धा:सा थौँकन्हे इप्पां थिप्पां मदयेक ब्वाँय् जुया च्वना । तर स्थीरम्ह मचाकाजि नाप च्वना: आ: नं लठ्ठ जुया: गफ्फ् यायेगु मन दनि ।