भाय् !!

मथुरा सायमि

 “आप्लिकेशन ल्यायको छ? ” हानं न्यन ।
“छैन सर। “
” अनि तिम्रो जथाभाबी ? पख् तॅलाई ” थुलि धयाः तंचायाः सरं तेबिलय् तयातःगु कथि काःवन । आःला दः दाइगु हे जुल । ल्हाती प्यत्थु प्यत्थु दायेगु ला चलन हे । ल्हाः हिइयाः वाथावाथा हे कनीगु । ल्हाः छलय् यातकि तमं झन तुतीताती लाःलाःथाय् भ्यभ्यलुक्क नं दाइगु । ख्वयां साध्य मजू ।                 

••••••••••••••••••••••••••

मचाबले जितः नेवाः भाय् स्यंम्ह जि थः हे मां । मांया थःछे येय् , मरूहिति क्वाकचा । नेपालय् प्रजातन्त्रया नाम-निशाना हे मलूनिगु ई । उगु इलय् काय् मस्तयत हे आखः ब्वंकेगु चलन मदुनि धासा म्ह्याय् मस्तयत आखः ब्वनेत पितछ्वयेगु धयागु वाक्काः हे तयेम्वाःगु खॅ ।
उकिं जि मां अले अबुयात हे नं उमि मां अबुपिसं स्कूल धयागु छ्वःगु मदु । आः थे उबले त्वालय् त्वालय् , चुकय् चुकय् , बहाः बहालय् खॅयत सॅयत ध्वदुइ मखु सुं। नेवाःतयगु पुचः दुने बेजात/ गैर नेवाःत धयापिं नं खने मदु सुं । बालं च्वं वइपिं नं मदु । उकिं नेवाःतय् पुचलय्/ समाजय् सकसिनं नेवाः भाय् हे ल्हाइ । मेमेगु भाय् नं सः धाइपिं द्वलय् स्वलय् छम्हनिम्ह ।
जि नं , उकिं , मचाबले थःगु हे भाय् छता ल्हाये सः । मेगु धयागु छुं मसः ।
ग्वरः ज्वनाः गुरूमांजुया छेय् वनाः मचा-बर्णमाला ज्ञान हासिल यानासां लिपा वनाः स्कूलय् हे लाःवन । अन खॅय् भाय् हे फुक्कं । नेवाः भाय् धयागु ब्वनेम्वाः । मब्वंकू । क्लासय् नेवाः पासापिंलिसे भायपो नेवाः भाय् ल्हायेपिं सुं मदु ।
शुरूइ खॅय् भाय् थाकुल । ब्वब्वं वनाबले , च्वच्वं वनाबले बुलुहुॅ बुलुहुॅ सयावल , भचाभचा । थुयावल भचाभचा । फुक्क चल्ताहय् जुयावन ।
छकः म्हं मफयाः प्यन्हु न्यान्हु तक्क स्कूल वने मखन । लिपा वना ।सरं झ्वःलिं होम वर्क चेक याःवल । जितः खनेवं स्कूल छाय् मवयागु धका न्यन। जिं छुं मधया । ” उठ् ” धाल । दना ।
” किन नआयको स्कूल? के भो ?” धका हानं न्यन । छुं मधया । धायेत दः थाकुयाच्वन ।
” आप्लिकेशन ल्यायको छ? ” हानं न्यन ।
” छैन सर। ”
” अनि तिम्रो जथाभाबी ? पख् तॅलाई ” थुलि धयाः तंचायाः सरं तेबिलय् तयातःगु कथि काःवन । आःला दः दाइगु हे जुल । ल्हाती प्यत्थु प्यत्थु दायेगु ला चलन हे । ल्हाः हिइयाः वाथावाथा हे कनीगु । ल्हाः छलय् यातकि तमं झन तुतीताती लाःलाःथाय् भ्यभ्यलुक्क नं दाइगु । ख्वयां साध्य मजू ।
सर न्ह्योने वयेव जिगु म्हुतु फ्यारफ्यार हे खात । धया, “सर , झिङ्गा-कुखुराले तोकेको सर झिङ्गा-कुखुराले …! अनि ज्वर आयको । ”
जिगु खॅ मथुयाः सर वाताहाॅ च्वन । छु छां मधाल । दा नं मदाल ।
जूगु मेगु मखु– दः भुजिंखां न्याःगु !!!