माइकिन सर !!

मथुरा सायमि                        “ल ,सर आउनु भो । तुरून्त क्लासमा आउ । तुरून्तै । अनि त्यसै पस्ने हैन । माइकन सर भनेर मात्रै पस्ने । माइकन सर ।”

मचाबले जि निगू स्कूलय् ब्वनेलं । शान्ति निकुञ्ज बिद्यालय व पद्मोदय हाइ स्कूल, पुतली सडक । टेष्ट जाॅच बीत व यस. यल.सी.या फारम भरय् यायेत जि लिपा शान्ति निकुञ्जय् हे वना । बिसं 2012सालय् । उबले व स्कूल भौक्यबय् सरय् जुइ धुंकल । आः नं अन हे अबस्थित दु ।
शान्ति निकुञ्जय् ब्वनाच्वनाबले छकः । प्यंगू/न्यागू तगिमय् जुइमाः जि । ब्वनेगुली उलि ध्यान मदु ।अय् धकाः सुंलिसे हालाः ल्वाना जुइ सःम्ह नं मखु । शान्त , चुपचाप ।

क्लाश खालि जुयाच्वनीगु इलय् मस्त पिहाॅ पिहाॅ जुइगु जुयाः क्लाशय् छ्म्ह छम्ह मोनिटर (monitor) तयाबीगु । वयात कथि छपु नं बियातइ । टीचर क्लाशय् मवोतले वं फुक्कसित कण्ट्रोलय् तयातइ । उकिं मोनिटर जुइम्ह मचा ब्वनेगुली दखल मदुम्हसां जिउ। मुख्य व भचा हारांम्ह व सकसितं ख्यायेफुम्ह जुइमाः । अले वं धाःथे च्वनेमाः । लः त्वनेमाःसां वयाके हे न्यनावने माः , खि-च्व हे फायेमाःसां वयाके मन्यॅसे वने मदु । धयागु खॅ मन्यनकि कथिं दायेगु अधिकार ला क्लाश टीचरं वयात बिया हे तइगु ।
छकः जि वयाके हे न्यनाः बाथरूम वनागु । च्व फाना हे च्वनातिनि व दुररर् ब्वाॅय् वयाः धाःवल , “ल ,सर आउनु भो । तुरून्त क्लासमा आउ । तुरून्तै । अनि त्यसै पस्ने हैन । माइकन सर भनेर मात्रै पस्ने । माइकन सर ।
फायेफाये थे क्लासपाखे स्वयावना । मोनिटरं ब्यूगु मन्त्र उघ्रिमय् हे लोमन । वयाके हे दुररर वनाः छकः न्यना , ” के भन्ने ले सरलाइ ? ”

” माइकिन सर ।”
लोमली धकाः मतिंमतिं ” माइकिन सर माइकिन सर “धका कथुइ घानावना । धात्थें सर ला क्लाश दुने हे ।
जिं अले ” माइकिन सर ” धाधां दुहाॅ वना । सरं त्वालां स्वयाच्वन । जिं धयागु छु , जिं हे मथू । फच्छ्या ।
दच्छिति लिपा जिं थुयावल। व धाःगु ला , may I come in, sir ? धाःगु सकाः जुयाच्वन । जि दुहाॅ वये ला , सर? धकाः अनुमति फ्वंगु । हाहा !

उबले छु नि छु , आः लुमनीबले सकाः न्ह्यैपु — माइकिन सर !!!   (sketch courtesy : repblubica)