द्यो-खुं !!

मथुरा सायमि

नेपाःया स्वनिगलय् सखे दक्कय् न्हापां जन-स्तरय् जनताया मनोरञ्जनयात ध्यानय् तयाः दक्कय् न्हापां चायेकूगु सिनेमा हल धयागु ” जन सेवा सिनेमा हल ” खः । थ्व सिनेमा हल येया न्हू सतकय् लाः । थ्व हल नीस्वंगु बिसं 2004 पाखे खः । अले अन दकलय् न्हापां क्यंगु सॅकिपा (फिल्म)या नां खः — राम बिबाह ।
तिकत कया , तःधंगु हलय् च्वना फिल्म स्वःवनेगु धैगु नेपाःया मनूतयगु लागी छगू न्हूगु अनुभब जुल । छगू पत्याः याये थाकुगु सत्य खत । अले थुकिया हे प्रचार-प्रसार यायेत थाय् थासय् त्वाःत्वालय् फिल्मया पोष्टर तिकेगु ज्या यात ।
जि थॅहितिमि । जिगु त्वालय् मू-चुक दथुइ हे फल्चा छगू दु । द्योपिनिगु देगः मन्दिर नं लिक्क लिक्कसं यक्व दु । तःधंगु बौध्द-चैत्य जुल, गणेद्योया मन्दिर अले फल्चाया हे लिक्कसं पुलांगु नासःद्योया मन्दिर छगू नं दु ।

फिल्मया बिज्ञापनया झ्वलय् छन्हु अन हे फल्चा दुने पोष्तर छपाः अंगलय् तिकेहल । रामचन्द्र , सीता महारानी अले लक्ष्मण स्वम्ह झ्वःलिं दनाच्वंगु पोष्टर अतिकं बांलाः । मेपिं स्वया अन म्हिता च्वनेपिं जिपिं मस्त छपुचः तसकं लयताः । फोटो स्वस्वं लुदं फुदं । फल्चा हे झझ्झःधाः।
छन्हु पुजाभः ज्वनावोम्ह बाज्यःतिवंम्ह मिसां अन हे वया जल नं छात , स्वां-सिन्हः नं तिकल, धिबा छगः नं छाल । अले जाकिं पुज्याना द्योपिं स्वम्हं भागि यानावन । जिपिं अजूचाल । धिबा जिमिसं लाना ।

थ्व प्रकृया अन न्हीन्ही चलय् जुल। मेमेपिसं नं द्योयाके वयाकथं छकः पुज्याना, भागियानाः वनीगु जुल । बुलुहुॅ बुलुहुॅ मरिचरिछापिं नं दत । लाना कायेगु । अले अन मुनाच्वनापिं जिमि थःथः इना नयेगु । गबलें ला धिबा हे नं च्यागः झिगः खाइगु । द्योया परसातं जिमि ताकातुकु नयनं दत , भचाभचा थयनं दत । जिपिं दङ्ग ।
छन्हु ।न्हालिपा थे फल्चाय् च्वंवया । हिस्स । अन पोष्टर मदु । सु बेइमानं खुयायन । जिमित फियां फी मफयक तं पिहाॅ वल । अले जिमिसं वयात नुगलंनिसें सराः बिया — सीमा झ्वकनीमा छ । ल्हाः निपां ध्वगिनाः कुतुं वनेमा छं ।” !!!!