अलःमा नं सिमा !!

मथुरा सायमि

ब्वा छेय् दुहाॅ वयसातं जिमित खॅ कन , ” हानिचा बहनी पाजुपिंथाय् बाइसकोप क्यनेगु धाल । सकलें वा धका सःतल ।”
जिं न्यना , ” अय् धयागु छु ब्वा ? ”
ब्वां कन , ” फिलिम का फिलिम। प्याखं । ”
गबलेंछकः स्वयेलंगु मखुनि । थ्व बिसं 2001पाखेया खॅ । उबले सिनेमा हल धकाः नेपालय् गनं छथाय् दुगु नं मखुनि। थःथःगु छेय् सुनासुनानं क्यनेगु याः । स्वयेगु याः।
बहनीसिया नयेज्या धुंकाः ब्वां जितः ल्हाः ज्वना पाजुबाज्यापिंथाय् ब्वनायन । किलागलय् । न्ह्याइपुगु व यइपुगु उलिथुलि हे मदु ।
प्याखं क्यनीगु जुयाः अन यक्व हे मनूत मुनाच्वन । बैगः ताहाकः । यक्व मनूत न्ह्यं । बॅय् सतरंजा व सुकू नं झोझोलिं लायेहल । गन छु स्वयेगु , मसिया हे च्वनतिनि । अनया लकस कौतुहलपुर्ण जुयाच्वन । मन याउॅसे , सिचुसे , न्ह्याइपुसे च्वंच्वन ।
” हल हल हल” धाल । छु हल, छु हल । सकलें स्वाहानेपाखे स्वःवन। फिलिम क्यनीपिं वोगु जुयाच्वन । प्वःप्वः सामान हःगु जुयाच्वन । बाताबरण झन रसमय जुल। उत्सुकतां मनयात लुचुलुचुं ल्ह्वन ।
ध्याक्व अंगःलिक्क स्टायण्डदुगु तुयुगु कापः पर्दा ब्वयेकल । रील चक्का नं दु निचाःस्वचाः । स्वयेगु व तुयुगु कापतय् धका सिल । जिपिं छपुचः मचातयत छथाय् फ्यतुकल ।
भचा जायव फिलिम क्यन । क्यनेत न्हापां मतमित फुक्क स्यात । पर्दाय् लाइट पास यात । खने मदइ धका जि पर्दाया लिक्कसं फ्यतूवना । तःधीम्ह मनू छम्हसिनं थनाः दः तापाक तयेहल । पर्दा लिक्क च्वने मज्यू धाल । खनेमदै धका न्ह्योने च्वंवनागु ल्याः ।
जिन्दगी फिलिम धयागु नं छगू स्वयेखन । संकिपा धाइ झीसं । मनूत ला खने दु । म्हुतु नं वाकावाका संकू । सः छतिं मदु । व ला ‘ नबोल्ने फिलिम ‘ धाःगु जुयाच्वन । हाहा ।
खतु व अलःमा हे खः तर मस्वनिपिन्त भरायमागु सिमा !!!