फादर्स डे

चिबाखँ

-रिता महर्जन
रिटायर्ड जुइ धुंकुम्ह मिनलालया थौं बौ या ख्वा: स्वयेगु दिं जुसां ख्वा: चमकं। सुथ न्हापां हे निम्हं म्ह्यायपिसं नं फोन याना: थौं बा:या ख्वा: स्वयेत वये मफइगु खँ धयाहल। म्ह्यायपिं मवैगु खँ न्यना: वं तस्कं म्हाइपु तायेकल !                                           ख्वा: खिउँसे तया च्वंम्ह थ: भा:तया नुग: तयेत रमां धाल ,
” म्ह्याय्पिं थजा:गु महामारीया इलय् गथे वइ ? थन काय् भौ छय्पिं द हे दु । इमिसं ख्वा: स्व हे स्वइ  नि ! छाय् मन मच्वंका च्वनेमागु छि ?
न्हि अथें वन । बहनि धात्थें काय, भौ व छय्पिं सकलें मा अबुया कोठाय् वल । होम डेलिभरय् व:गु हँ धाधां थपाय् ग्व:गु केक ज्वना: बौया ख्वा: स्व:वल । अबुम्हेसित केक ताकेबिल। काय् भौ छय् सकसिनं ; ह्यापी फादर्स डे” धका: लापा थाल। अले मां अबुया ख्वालय् केकया क्रीमं इलाबिल । काय् व छयपिंस धमाधम फोतो काल । फेसबुक लाइभ तकं यात । लयता: इपिं ।
मिनलालया कोलेस्ट्रोल हाइ जुया क्रिम दुगु केक नयेमज्यू। “का थ्व चकलेट केक छिम्त य: खला ! न न्हिं ।” धका: छय् यात केक बियाछ्वत । छयपिं केक ज्वना पिहांवन।
काय व भौ नं लयता: , फादर्स डे हनेखना:। तर मिनलालया नुग: मच्वं । वयात काय् या फादर्स डे ल:ल: मधा: । म्ह्यायपिसं बौया ख्वा: स्व:इगु हे य: ता: वयात । फादर्स डेय् नं वया नुग: त्याके मफु ।                                                                                                                                                     sketch courtesy : Devian Art