लकडाउन V/S सटडाउन

– नरेशवीर शाक्य
स्वनिगः दुने न्हियान्हिथं कोरोना भाइरस कोभिड् १९ या पिआरटि टेष्ट पोेजेटिभ लिपा भाइरसं प्रभाविन जूपिनिगु ल्याः अप्वयेवं स्वनिगः दुने सरकार प्रशासनं ‘शटडाउन’य प्रावधान लागू याःगु दु । साउन २५ गते निसें १५ न्हूया निंतिं थ्व प्रावधान लागू यायेगु येँ, यल व ख्वपया जिल्ला प्रशासनं निर्णय यानाः कार्यान्वयन याइगु जूगु दु ।
लककाउन व सटडाउनया खँग्वःयात कयाः आपालं मनूत अलमलय् लानाच्वंगु दु । न्हापा नेपाः सरकारं १२० न्हू लकडाउन यानाः आम नागरिकया सम्पूर्ण दैनिक जीवन हे थप्प यानाब्यूगु खः । उगु लकडाउनय् मनूत खुल्लारुपं पिहाँ वये मदइगु, छुं नं कथंया सरकारी वा निजि कार्यालय मचाइगु, उद्योग ब्यवसाय व पसः चायेकेगु तक्कं निषेध यानातःगु खः । आःया सटडाउनया प्रकृति नं उकथं जुइगु खःकि, पसः चालीगु खःकि मखु, मनूत अफिस वये वने मालीगु खः कि मखु धयागु अनेक अन्यौल ब्वलनाच्वंगु दु । थथे जूगुया कारण सम्बन्धित निकायं लकडाउन व सटडाउनया फरकयात बांलाक थूइका मब्यूगुलिं खः । लकडाउनया इलय् १२० दिं तक्क आम मनूतय् दां दाछि हे आम्दानी यायेमखंगुलिं आः धयातःगु सटडाउनया स्थिति नं व हे खःला ? धयागु त्रास ब्वलनाच्वंगु दु ।
आःया सटडाउन न्हापा सरकारं देय्न्यंक लकडाउन याःगु थें मखु । थ्व सटडाउन गन गन कोरोनाया संक्रमण अप्वया वनाच्वंगु दु, कोरोनाया ल्वचं कःपिं मनूतय्गु ल्याः अप्वया वनाच्वंगु खः, अज्यागु निश्चित प्रभावित थासय् जक सटडाउन यायेगु नीति नालातःगु खः । कोरोना संक्रमण समूह दुने न्यना वनेफइगु संभावनां कोरोना खने दुगु थासय् स्थानीय प्रशासनं सिल यायेगु, अन मनूतय्गु गतिविधि नियन्त्रण यायेगु ज्या यायेफइ । अथे हे आः १५ न्हू तक्क स्थानीय प्रशासनं आम जनतायात बियाच्वंगु आवश्यक सेवा वाहेक मेमेगु सेवा नं सटडाउन याःगु समाचार पिदना हे च्वंगु दु ।
कोरोना भाइरस ल्वचं बचे जुइत आःया निंतिं मनूतनाप निश्चित ल्याखय् तापाक्क च्वनेगु, लिक्क मवनेगु, माक्स छ्यलेगु व दुहाँ पिहाँ जुइगु इलय् सानिटाइजर वा साबुं लखं क्वात्तुक ल्हाः सिलेगु उपाय नाले हे माः । मेखेर स्थानीय प्रशासनं कोरोना भाइरसया संक्रमण दु धकाः थाय् किटान यानातःगु लागा बाहेक मेमे थाय्या पसः, अफिस वम दैनिकी जीवन आः गथे चलेजुयाच्वंगु खः उकथं हे जुयाच्वनी । सरकारं यातायातय् जोर विजोर नंम्वर प्रणाली लागू यानातःगु दु, उकथं हे यातायात साधनत न्ह्याइ । सरकारं आः नं मनूत मुनीगु ज्याझ्वः मयायेत इनाप यानाच्वंगु दु । स्थानीय प्रशासनं थ्व नीति नालेत कडारुपं चेक÷जाँच याइ । सुना नं अटेरी जुयाः नियम उल्लघंन यातःधाःसा, प्रशासनया उजं मन्यन धाःसा वयात कारवाही याइ ।
थुलि यानाः नं कोरोना भाइरसं संक्रमण जूपिं मनूततय्गु ल्याः म्हो मजुल, ल्वचंकःपिं मनूतय्गु ल्याः अप्पया वन धाःसा सरकारं हाकनं निषेधआज्ञा जारि यायेफइ, उकिनं मजिल धाःसा लकडाउनया लागू याइ, उकिनं मनूत अत्तेरी जुयावन धाःसा कफ्र्य हे लगे यायेत वाध्य जुइ ।
थथे जुइके मबिइत आः थःपिं हे होशियार, सावधान जुइमाःगु आवश्यक दु । म्वायेक म्वायेकं छेँ नं पिहाँ मवनेगु, पिहाँ वनेबलय् हुलमुल मयायेगु, फक्वः तापाक्क च्वनाः थःगु ज्या क्वचायेकेगु, पिहाँ वनेबलय् अनिवार्यकथं माक्स तया वनेगु, माक्स मदुपिं मनूतपाखें तापाक्क च्वनेगु, दुहाँ पिहाँ वये वने यायेबलय् साबुं व लखं मारी ल्हाः सिलेगु यात धाःसा कोरोना संक्रमणपाखें बचे जुइफइ, लकडाउन, सटडाउन, निषेधआज्ञा व कफ्र्यूया स्थितिं नं बचे जुइफइ ।