संक्रमित भित्रन थालेपछि उपत्यका प्रवेशमा साँझ ७ बजेदेखि बिहान सात बजेसम्म पुर्णरुपमा प्रतिबन्ध , काठमाडौं उपत्यकामा उच्च सतर्कता अपनाउन आग्रह ,

काठमाडौं/ काठमाडौं उपत्यकामा संक्रमित बढेको मूल कारण संक्रमित क्षेत्रबाट संक्रमण भएर आएकाहरु भएको कारण बेलुकी ७ बजेदेखि बिहान ७ बजेसम्म पूर्ण रुपमा उपत्यका प्रवेशमा प्रतिबन्ध लगाएको छ । उपत्यकामा प्रवेश गर्न स्वीकृत लिनुपर्ने व्यवस्था भएपनि त्यसो हुन नसकेपछि अन्धाधुन्ध रुपमा बाहिरबाट काठमाडौं प्रवेश हुनु र शहर बजारमा भीड बढेपछि बाहिरबट आएका संक्रमितहरुका कारण उपत्यकामा समुदाय स्तरसम्म कोरोना फैलिसकेको विज्ञहरुले अघि नै बताइसकेको छ । त्य्यसैगरी
काठमाडौँ सङ्कट व्यवस्थापन केन्द्र (सीएमसी)ले काठमाडौँ उपत्यकामा कोरोना (कोभिड–१९) भाइरसको सङ्क्रमण फैलनबाट रोक्नका लागि आवश्यक सजगता अपनाउन सबैलाई आग्रह गरेको छ ।
सरकारले साउन ७ गतेदेखि बन्दाबन्दी खुलाएसँगै काठमाडौँ उपत्यकामा कोरोना सङ्क्रमितको सङ्ख्या बढेकाले उच्च सतर्कता अपनाउन सीएमसीले सरोकारवालालाई आग्रह गरेको हो । यहाँका उद्योग धन्दा, कलकारखाना र सबै कार्यालय सुचारु हुँदा विभिन्न जिल्लाबाट मजदुर आउने क्रम बढेसँगै कोरोनाका सङ्क्रमितको सङ्ख्या वृद्धि भएको सीएमसीको बुझाइ छ ।
काठमाडौँ, सङ्कट व्यवस्थापन केन्द्र (सीएमसी)का सल्लाहकार एवं काठमाडौँ जिल्ला समन्वय समितिका प्रमुख शिवसुन्दर राजवैद्यले उपत्यका प्रवेश गर्ने व्यक्तिलाई उच्च निगरानी राख्न जिल्लाका सबै स्थानीय तहलाई आग्रह गरिएको बताए । उनले उपत्यकामा कोरोनाले भयावह रुप लिनसक्ने भएकाले भारतबाट आउने नागरिकको अनिवार्य पीसीआर परीक्षण गराएर मात्र प्रवेश गर्न दिनुपर्ने व्यवस्था कार्यान्वयन गराउनुपर्ने बताए । उपत्यकामा प्रवेश गर्ने व्यक्तिको मोबाइल नम्बर समेतको विवरण प्रत्येक नाकाबाट दैनिक रूपमा जिल्ला प्रशासन र प्रहरीमार्फत अनिवार्य रूपमा उपलब्ध गराउने व्यवस्था गर्नेमा जोड दिइएको छ । लकडाउन खुलेसँगै उपत्यकामा सवारीसाधन र विभिन्न स्थानमा भीडभाड बढ्दै जान थालेकाले सामाजिक दूरी कायम गर्ने, अनिवार्य मास्क लगाउने र सरसफाइ गर्ने काममा सबैले जिम्मेवारी बहन गर्नुपर्ने हुन्छ ।

यसैबीच गृह मन्त्रालयले कोरोना संक्रमित भित्रिरहेको भन्दै काठमाडौं उपत्यकामा साँझ ७ बजेदेखि बिहान ७ बजेसम्म प्रवेश गर्न पुर्णरुपमा प्रतिबन्ध लगाएको छ। यो निर्णय बिहिबार साँझदेखि लागु गरिएको गृह मन्त्रालयले जनाएको छ।
गृहले अत्यावश्यक काम भएका बाहेकलाई पास जारी नगर्न पनि देशभरका जिल्लाहरुलाई निर्देशन दिएको छ।