नेपालभाषाया पाठ्यक्रमयात कया: सहलह

येँ /  स्थानीय विषय नेपालभाषाया पाठ्यक्रम ‘येँ देय् म्हसिका’या बारे आइतवाः येँया सभागृहले शिक्षाविद्पिनिगु दथुइ छगू सहलह ज्याझ्वः जुल ।

येँ महानगरपालिका शिक्षा विभागया ग्वसालय् जूगु उगु ज्याझ्वलय् छगू तगिं निसें च्यागू तगिंतक्कया स्थानीय विषय नेपालभाषाया पाठ्यक्रमया कार्यपत्र नेपाल आदर्श माविया पूर्व प्रधानाध्यापक बरुण प्रसाद बैद्यं न्ह्यब्वयादीगु खः । उगु कार्यपत्रय् मगाः मचाःगु खँयात कया: लुम्बिनी विश्व विद्यालयया पूर्व कुलपति प्रा.डा. त्रिरत्न मानन्धर, नेपालभाषा केन्द्रीय विभागया उप प्राध्यापक राजन लाल जोशीं लगायतं तयादीगु खँय्  डा. चुन्दा बज्राचार्यंं लिस: बियादीगु खः ।

शिक्षा काइपिं ब्वंमिपिन्त सहज जुइकथं फुक्कं स्कूलय् पाठ्यक्रम  छथी जुइमा:गु  , व्याकरण व शब्दकोशय्ए एकरुपता हयेमाःगु खँय् डा. मानन्धरं ब: बियादीगु ख: । अथेहे कार्यपत्रय् योजना पक्ष व कार्यान्वयन पक्ष याना:  निगु ब्व दुगु ख: ।

नखः चखः धैगु नसा त्वसाया नितिं जक मखु उकिइ बैज्ञानिकतानं दुगुलिं पाठ्यक्रमनं बैज्ञानिकताया आधारय् तयार यायेगु कुतः जूगु खँ सकारात्म रुपं कायेमाःगु खँय् उप–प्राध्यापक जोशीं धयादिल ।

प्रा.डा. चन्दा बज्राचार्यया संयोजकत्वय् बरुण प्रसाद बैद्य, मदन रत्न मानन्धर, नरेश वीर शाक्य, मोतीराज खनालपिं स्थानीय विषय नेपालभाषा पाठ्यक्रम निर्माण समितिया दुजः जुयादी ।

किपा नेवाः सूचना केन्द्र, राजेन्द्र रञ्जित