देय् न्यंकया नेवाः मिसातयेत संगठित यानाः आर्थिक, सामाजिक व राजनैतिक रुपं सक्षम यानाः नेतृत्व बिकास यायेगु तातुनां गठन जूगु नेवाः मिसातयेगु राष्ट्रिय संगठन नेवाः मिसा दबूया स्वक्वःगु बुदिं शनिवाः यलय्  तःजिक हंगु दु ।

नेवाः मिसा दबूया नायः रश्मिला प्रजापतिया नायःसूइ न्ह्याःगु ज्याझ्वः मूपाहाँ प्रदेस नं. ३ या सांसद शोभा शाक्यजुं उलेज्या यानादीगु खः । ज्याझ्वलय् निम्ह नेवाः मिसापिन्त हनेगु नापं छम्ह नेवाः मिसायात ‘रत्नदेवी प्रजापति सिरपाः’ लःल्हागु दु । खुगू दसक निसें भाषिक आन्दोलनय् मदिक्क न्ह्याना नेपालभाषा साहित्य सृजना नापं राजनितिक ख्यलय् नं सक्रिय रूपं न्ह्यज्याना यक्वसित प्रेरित यानादीगुयात कदर यासें मय्जु सुवर्ण केसरी चित्रकारजुयात हंगु खः । सुक्ष्मबिज्ञानय् पि.यच.डी यानादीम्ह न्हापाम्ह मिसा नापं संबैधानिक आयोगया नायः जुयादीम्ह न्हापांम्ह मिसा कथं डा. कयो देवी यमियात नेवाः मिसा दबूपाखें हंगु खः ।
अथेहे झिदँ न्ह्यःनिसें मदिक्क नेवाः मिसा अधिकार ख्यलय् ज्या यानादीम्ह छम्ह नेवाः मिसायात रत्नदेवी श्यामदास प्रजापति ट्रष्ट पाखेँ झिद्व तका दांया ‘रत्नदेवी प्रजापति सिरपाः’ थुगुसि Development Worker व Gender Expert मय्जु इन्दिरा श्रेष्ठजुयात लःल्हागु दु । वय्कः नेपालय् दकलय् न्हापां लैंगिक मैत्री ज्याझ्वः हयादीम्ह राष्ट्रिय योजना आयोगया दुजः जुया ज्यायानादी धुंकुम्ह खः ।