७४ वर्षीय फोक्सोका क्यान्सर रोगीले जिते कोरोनालाई, मनोबल दरो पारे कोरोनालाई जित्नसक्ने आफू प्रमाण भएको दाबी

चितवन/क्यान्सर रोगबाट पीडित ज्येष्ठ नागरिकले ३० दिनमा कोरोना जितेर घर फर्केका छन् । भारतबाट उपचार गरेर आउँदा कोरोना सङ्क्रमण पुष्टि भएपछि जेठ ८ गते भरतपुर अस्पतालमा उपचार गराइरहेका ७४ वर्षीय उनी कोरोना परीक्षणमा नेगेटिभ आएपछि डिस्चार्ज भएका हुन् ।
फोक्सोको क्यान्सरपीडित उनी कोरोना सङ्क्रमण निको भएर घर फर्किएपछि भरतपुर अस्पतालका चिकित्सकमा समेत खुसी छाएको छ । निकाे भएपछि उहाँले भन्नुभयो ‘उच्च मनोबल राखेमा कोरोना जित्न सकिन्छ भन्ने प्रमाणित भएको छ । अस्पतालमा रहँदा मैले चिकित्सकबाट राम्रो व्यवहार र उपचार पाएँ ।’
‘कोरोना लाग्दैमा आत्तिनुहुँदैन मनोबल दरो पार्नुपर्दछ, यसको उदाहरण म भएको छु ।’ उनले भने। उनीसँगै ७३ वर्षीया श्रीमतीले पनि कोरोना जितेर घर फर्केका छन् । उनकी श्रीमतीमा पनि सुगर, प्रेसर, बाथको समस्या रहेकाे र अहिले काेराेना निकाे भएको भरतपुर अस्पतालले जनाएको छ ।
बिहीबार गरिएको परीक्षणमा उहाँहरू दुवैको रिपोर्ट नेगेटिभ आएको अस्पतालका सूचना अधिकारी लीला पौडेलले जानकारी दिए । भरतपुर महानगरपालिका -६ केशरवाग घर भएका उनीहरूलाई वृद्धावस्थामा क्यान्सर रोगको उपचार गराएर भारतबाट नेपाल फर्कने क्रममा कोरोना सङ्क्रमित भएका थिए । त्यसको दुई दिनपछि छोरामा पनि सङ्क्रमण देखिएको थियो ।