संशोधन फिर्ता लिन सरिता गिरीलाई पार्टीको निर्देशन, नलिए कारबाही गरिने

काठमाडौं / विवादास्पद भनाइ राखेका कारण तथा संसदमा व्यक्तिगत रुपमा संविधान संशोधन प्रस्ताव राखेर निकै आलोचित बन्न पुगेका समाजवादी पार्टी हाल जनता समाजवादीका सांसद सरिता गिरिलाई पार्टीले व्यक्तिगत रुपमा दर्ता गरेको संविधान संशोधन प्रस्ताव फिर्ता लिन निर्देशन दिएको छ ।
बुधबार पार्टीका प्रमुख सचेतक उमाशंकर अरगरियाले विज्ञप्ति जारी गर्दै गिरीलाई संशोधन प्रस्ताव फिर्ता लिन निर्देशन दिएका हुन् ।
पार्टीले सो प्रस्ताव फिर्ता नलिए कारबाही गर्ने चेतावनी समेत दिएको छ ।
सरकारले लिम्पियाधुरासहितको नेपालको नयाँ नक्सा समेटेर निशान छाप संशोधन गर्न पेश गरेको संविधान संशोधन विधेयक खारेज गर्न माग गर्दै गिरीले संसदमा अर्काे संशोधन प्रस्ताव संसदमा दर्ता गराएकी थिइन् । स्रोत र प्रमाण नपुगेको भन्दै उनले प्रस्ताव खारेज गर्न माग गरेकी छन् ।
उनको सो प्रस्तावको तीव्र विरोध भइरहेको बेलामा पार्टीले भने यस्तो चेतावनी दिएको हो ।
मंगलबार मात्रै संविधान संशोधनसम्बन्धी विषयमा सबै दलले सैद्धान्तिक सहमति जनाएका थिए । तर गिरीले भने एकल रुपमा संशोधन प्रस्ताव दर्ता गराएकी थिइन् ।
उनले संसदमा राखेको धारणा र संविधान संशोधन बिरुद्ध अर्को संशोधन प्रद्ताव दर्ता भएपछि उनी निकै विवादमा आएको अवस्था रहेको छ ।