संविधान संशोधन प्रस्ताव भोलि प्रस्तुत हुने

काठमाडौँ/ बुधबार रोकिएको संविधान संशोधन प्रस्ताव आइतबार बस्ने प्रतिनिधिसभाको बैठकमा प्रस्तुत हुने भएको छ।
प्रमुख प्रतिपक्षी दल नेपाली कांग्रेसले केन्द्रीयकार्य समिति बैठकबाट निर्णय गर्न थप समय मागेपछि रोकिएको प्रस्ताव आइतबार प्रस्तुुत हुने भएको हो।
संसद सचिवालयले सरकारको परामर्शपछि निकालेको सम्भावित कार्यसूचीमा आइतबार सदनको पहिलो कार्य नै कानुन न्याय तथा संसदीय मामिला मन्त्री शिवमाय तुम्बाहाम्फेले प्रस्तुत प्रस्तुत गर्ने रहेको छ।
संशोधन प्रस्तावलाई समर्थन गर्ने निर्णय कांग्रेस केन्द्रीय समितिले शनिबार बेलुको लिने भएपछि संशोधन प्रस्ताव अघि बढ्ने भएको हो।
प्रतिनिधिसभाको बैठक आइतबार बिहान ११ बजे बोलाइएको छ। संशोधन प्रस्ताव प्रस्तुत भएपछि शुक्रबार संसदमा प्रस्तुत भएको आगामी आर्थिक वर्ष २०७७/७८ को बजेटमाथि छलफल सुरु हुनेछ।
सरकारले यही जेठ ९ गते संविधानको अनुसूची ३ मा रहेको नेपालको नक्सामा लिम्पियाधुरासहित समेटिने गरी संशोधन प्रस्ताव दर्ता गरेको थियो। भारतले अतिक्रमण गरेको लिम्पिायधुरा, कुटी, गुञ्जी, नावी, कालापानीसहितको भूभाग समेटेर राजनीतिक र प्रशासनिक नक्सा सार्वजनिक गरेपछि सरकारले संविधानको अनुसूची पनि संशोधन गर्ने प्रक्रिया अघि बढाएको हो।
साभार