ग्वाज्य: पाक (लुमंखँ)

भूषण लाल श्रेष्ठ

२०३३ साल पाखेया खँ खः । जि पसः पिवाः च्वंच्वनाबलय् छम्ह गाहकं झि(१०) तकाया ब्वहनि याना गैंदा मय् किपा दूगु सच्छि(१००) छपा ल्हातय् बिया थकल । उगु जमानाय् सच्छि वंगु धेबा खंकेत न साइत हे चूलाकेमाःगु । आः जुल मखुला फसाद !

गाहकयात ‘आसे न्हैं’ धका उखेंथुके जलाखला पसलय् सच्छिया चा:चु दु ला धका न्यंना । सुं छम्हेस्यां ‘धेबा हिलाबिइ’ मधा । काचाक्क सुं गुम्ह खुदरा साहुपिंसं द हे द:सां बीमखूगु । अले गल्ली पस: नापं दूगु थोक पसलय् न्यंनास्वया । अनया साहु न ‘का थ्व दु ज्यू ला धासें १/१ तका वंगु सच्छि पा ल्याःखाना बिल । जि लयतासलं धया – ‘यक्को यक्को सुभाय् कका !’

पसलय् व गाहक पिया हे च्वनखनि । बा न छतका वंगु झिपा थम्हं कया ल्यं फुक्क धेबा वइत बिल । वं कचिंग धाल – ‘गय् साहुजु, थ्व छतका छतका वंगु जिं गथेयाना घाना जुइगु ? जित ला थ्व मय का !’ ‘मेगू मदु । छिं खना हे दिल जुइ, व:गुमछि पसलय् धया बल्ल बल्ल तिनि चा:चु ज्वनावल ।’ बा न खँ पांथुइकेभनं धयादिल । ‘जिं न झितका झितका वंगु हजि धका मधाया । ककायाके दूगु ख:ला !’ जिं संभाव्यता प्वंका । व गाहक मतापहलं अन चिलावन । ‘छ गजा:म्ह ग्वाज्य पाक, उलिमछि कुत: याना हयेधुंका न मदु धका सुम्क च्वंसा मगा:ला !’ अबुं जित न्वानादिल ।

कलेजं लिहाँ वयेधुंका तुच्चा नया सनिलय् न्ह्याबलें पासापिं नाप च्या पसलय् मुनेगु । अले हलिमय् गन छु जुयाच्वन ? न्हूगु, क्वाःगु बुखँ छु दु धका खँ ब्याकेगु । तर दुत(आम्दानी) धाःसा धेबा छगः सुयाके दूगु मखु । च्या त्वने सिदयेका धेबा पुलेत न छम्हेसं मेम्हेसिया ख्वाः स्वयेमाःगु अवस्थाय् थीथी बेपार याना धेबा कमेयायेगु खँ अन जुइ । सकस्यां लाय् तया त्याम्पु, त्याक्सी कया धेबा मुनेगु न खँ क्वछिइ । हानं कलेज वन । अन लिहाँ वयेधुंका सनिलय् व हे च्या पसलय् मुना मेगू छुमाय् खँ न्ह्याइ – बेपार बस, त्याक्सी, तेम्पु व पस: तयेगु बारे ।

न्हिन्हि च्या पसलय् जुइगु खँल्हाबल्हा अनया साहुं मतापहलं न्यनाच्वनि । जिमिगु पुचःयाम्ह सुं छम्ह उखुनु व:गु मखनकि ‘थौं फलनाम्ह मव:, छु जुल ?’ धका क्यलफ्यल याना न्यनिगु ।

छन्हु च्या पसः साहु चि नम्ह खाथें मंमरु तालं पसःज्याः संच्वंगुलिं न्यना – ‘छु जुल साहुजु ? थौं म्ह सुख मदु ला छु ख:?’ ‘मखु भाइ, जि लाय् तयागु तेम्पु दुर्घतनाय् लाना स्यन ।’ साहुया मेगू प्यंग: तेम्पु न दयेधुंकल खनि । ‘जिमिसं याये धयागु बेपार व साहुजुं यानाक्यन ।’ जिं धया । ‘छिपिं जाग्वारा ग्वाज्य पाक:तयसं याना नइला ? छिकपिं भाजु खँ ल्हाना जक नइपिं । म्हिचाय् धेबा छगः मरुपिनि खँ धाःसा आगरा घ्यगराया खँ ल्हाइ ।’ साहुजुं ‘ग्वाज्य पाक’ धका हान छक अबु न थ:गु हे पसल् हक्कूगु उखुनुया खँ लुमन ।

गन छु यायेज्यू, छु यायेमज्यू, छु धायेज्यू व छु धायेमज्यू धैगु मस्यूम्हेसित ग्वाज्य पाक धाइ धका अलेतिनि सिल । ‘ह्याउँगु न मस्यू, वाउँगु न मस्यू’ धका नेपालभासाय् छुनाखँ हे दु । अबलेनिसें जि थ्व ‘ग्वाज्य पाक’ धैगु मनय् तयाच्वना ।

२ ८ अप्रिल, २०२०

कोलोरादो, अमेरिका ।