“लकडाउन उल्लंघन जूसा तःधंगु खतरा” : मेयर शाक्य

येँ । कोरोना भाइरस संक्रमण पनेगु लागिं सरकारं लागू यानातःगु लकडाउन उल्लंघन यासें राजधानी येँनं मनूत पिहां वनेगु व पिने जिल्लाया मनूत येँय् दुहां वयेगु यानाच्वंगु खँय् येँ मनपां गम्भीर चिउताः प्वंकूगु दु ।
कोरोना महामारीयात पनेगु छगू हे जक उपायया रुपय् नालातःगु लकडाउन अवधि दुने सुयातं राजधानी त्वःताः पिहां वनेगु वा छगू जिल्लां मेगु जिल्लाय् वनेगु अनुमति सरकारं मबिउनिसां वंगु छुं ईया दुने आपालं मनूत गाडीइ च्वनाः राजधानीं पिहां वनाच्वंगु व पिने जिल्लायापिं मनूत नं राजधानी येँय् वयाच्वंगु खने दयेवं येँ मनपां थ्व चिउताः प्वंकूगु खः ।येँ मनपाया मेयर विद्यासुन्दर शाक्यं थथे ल्वय् नियन्त्रणय् मवःनिगु इलय् हे मनूत छगू थासं मेगु थासय् वये–वने यानाच्वन धाःसा कोरोना विरुद्ध ल्वायेगु सरकारया कुतः विफल जुइगु खँ कनादीगु दु ।
वय्कलं धयादीगु दु, ‘लकडाउन सरकारं नं छुं ईया लागिं बाध्य जुयाः लागू याःगु खः । अवस्था नियन्त्रणय् वल धाःसा थुकियात छ्वासुका यंकेगु खँ सरकारं धाये हे धुंकूगु दु । उकिं छुं ई धैर्य यानाः सु गन दुगु खः अन हे च्वंच्वनेत इनाप यानाच्वना ।’
राजधानीइ च्वनेबलय् सुयातं नये त्वनेया समस्या दुसा उकियात महानगरपालिकां पूवंकेगु व उकिया लागिं महानगरं निरन्तर ज्या यानाच्वंगु खँ कँसें मेयर शाक्यं धयादिल, ‘उकुन्हु तिनि उपत्यका मेयर फोरमं नं निर्णय यायेधुंकूगु दु । आः उपत्यका दुने सुयातं नये–त्वनेया समस्या दुसा नगरपालिका फोरमं नं ग्वाहालि याइ ।’
येँ महानगरपालिकां नीतिगत निर्णय हे यानाः अति विपन्न, निम्न आय दुपिं व दैनिक ज्यालादारी मजदूरतय्त राहत इनेगु ज्या यानाच्वंगु दु । यदि सुयातं राहत मदुगु खःसा टोल फ्रि. नम्बर ११८० व ११३१ य् फोन यानाः जानकारी बियादीत नं वय्कलं इनाप यानादीगु दु ।
मनूत छगू थासं मेगु थासय् वये वनेगु ज्या न्ह्यानाच्वन धाःसा कोरोना नियन्त्रण यायेत थाकुइगु व उकिं यानाः गम्भीर लिच्वः वये फइगु खतरा दुगु खँ नं मेयर शाक्यं कनादिल । उकिं कोरोनापाखें छुं कथंया खतरा मवयेमा धकाः सरकारं लागू यानातःगु लकडाउनयात सर्वसाधारण लिसें सकलें कर्मचारी व प्रहरीपाखें नं पूर्ण रुपं पालना यानादीत नं वय्कलं इनाप यानादीगु दु ।