लुति अजिमा परिसरमा नयाँ सत्तलको शिलान्यास

काठमाडौं /लुति अजिमा (इन्द्रायणी) मन्दिरसँगै नदी किनारमा नयाँ सतलको  फागुन २८ गते बुधबार एक कार्यक्रमकाबिच शिलान्यास गरियो ।
प्रमुख अतिथि काठमाडौं महानगर पालिकाका मेयर विद्या सुन्दर शाक्यले सतलको शिलान्यास गर्नुभएको थियो भने उपमेयर हरिप्रभा खड्गी तथा वडा १७ वडाका अध्यक्ष नवीन मानन्धर शिलान्यास पुजामा सरिक हुनुभएको थियो ।
काठमाडौं महानगर पालिका वडा नं१७ स्थित विष्णुमति नदी किनारमा अवस्थित लुति अजिमा राजा गुणकामदेवले स्थापना गरेको खड्ग आकारको कान्तिपुर महानगरको एक महत्त्वपूर्ण ऐतिहासिक , पुरातात्त्विक , धार्मिक स्थलमध्ये एक रहेको उल्लेख छ ।
यसलाई शक्ति पीठको रूपमा पनि लिने गरिन्छ । यस मन्दिरको परिसरमा काठमाडौंका नेवार समुदायका विभिन्न जात-जातीहरुको अन्तिम संस्कार गर्ने मसान र घाट रहेको छ ।
विसं २०७२ वैशाख १२ गते गएको महाभूकम्पका कारण यहाँको मन्दिर पनि क्षति भएको थियो भने केही समय अगाडि मात्र यसको पून:निर्माण सम्पन्न भएको थियो । यस क्षेत्रको विकास ,संरक्षण , संवर्द्धनको निम्ति काठमाडौं महानगर पालिकाको कार्यलयले एक गुरु योजना पनि बनाएको छ ।
कार्यक्रम स्थानीय द्य:पाला गुठी मातहतको इन्द्रायणी परिसर गुरुयोजना निर्माण सहयोग तथा उपसमितिको आयोजनामा भएको थियो ।
विधिपूर्वक पूजा गरि सत्तल शिलान्यास गरिसकेपछि एक औपचारिक कार्यक्रम आयोजना गरिएको थियो । कार्यक्रममा मेयर शाक्य प्रमुख अतिथि , उपमेयर हरिप्रभा खड्गी, प्रदेश सांसद वसन्त मानन्धर , महानगरका प्रवक्ता तथा १५ वडाका अध्यक्ष इश्वरमान डंगोल , सम्पदा समितिका संयोजक तथा १८ वडाका अध्यक्ष न्हुछेकाजी महर्जन , १७ वडाका अध्यक्ष नवीन मानन्धर , नेवा: देय् दबूका अध्यक्ष नरेश ताम्राकार र विभिन्न जातीय गूठीका प्रतिनिधिहरु अतिथिको रुपमा आउनु भएको थियो ।
कार्यक्रममा मन्तव्य राख्ने क्रममा मेयर शाक्यले सम्पदा सबैको साझा सम्पत्ति भएको बताउँदै भन्नुभयो “यसको संरक्षण गर्नु , विकास गर्नु महानगरको दायित्व हो । साथै महानगर पालिकाले विभिन्न क्षेत्रका सम्पदाको जिर्णोद्दार , पुन:निर्माण कार्यमा सहयोग गरेको बताउँदै भन्नेभयो “काठमाडौंको सम्पदाको सबै जिम्मा लिन महानगर पालिका सक्षम छ ।”
प्रदेश सांसद वसन्त मानन्धरले पुजारी समुदाय सक्रिय भएर मन्दिर पुन:निर्माण गर्न सफल भइसकेको स्मरण गरे । त्यसैगरी उपमेयर खड्गीले सम्पदा हाम्रो पहिचान भएको बताउँदै आफ्नो मन्तव्य राख्नु भएको थियो ।
निर्माण हुन लागेको सत्तलको लागत १ करोड , १७ लाख, ४ हजार , १ सय ७९ रुपियाँ रहेको छ । २०७७ साल बैशाखसम्म यसको निर्माण सम्पन्न गर्ने लक्ष्य लिइएको छ ।