चीनं नियन्त्रणय् का:थें कोरोना भाइरस नियन्त्रणय् हयेत अमेरिकायात थाकुइफु !

रोशन श्रेष्ठ

कोरोनाया आतंक चीनबाहेक मेमेगु देसय् क्वल्हाइगु संकेत मदु। अमेरकाय् नं थ्व भाइरस ब्यापक न्यनेधुंकल, थन गुलिसित पुन धैगु ल्याखाय् हे मफु, छाय् धाःसा परिक्षण याये हे मफु। आःतक करीब १ लाख ति जक परिक्षण यायेफत । परिक्षण मयागुलिं हे म्हो मनू संक्रमित धैगु खबर वयाच्वन धाःसा उकिं यात बाँलाःगु खबर धायेमछिं।

नेपालय् नं कोरोनासंक्रमित यक्व मदु थें ताःगु खनेदु, थ्व वास्तबय् नेपालय् कोरोनाया संक्रमण परिक्षण हे बाँलाक्क मजूगु या लिच्वः खः।

कोरोना परिक्षण ३गु स्टेजया जटिल परिक्षण खः। थ्व प्रविधि अमेरिका याके दुसांतबि परिक्षण यायेतमाःगु टेस्ट किट अमेरिका य् उत्पादन मजू। मेमेगु थासय् आउटसोर्सिङ याना अमेरिका या आवश्यकता पूवंकाः च्वंगु, तर आः ग्लोबल सप्लाई चेन भताभुङ्ग जूबलय् अमेरिका टेस्ट किट हे मदया वाथावाथा कनाव्वंगु दु । आपत्कालीन कथं दक्व वासःकम्पनि व अनुसन्धानशाला नाप ज्या याना आः टेस्ट किट उत्पादन याना हल, मेगु वालं निसे तिनि अमेरिका ४लाख प्रति वाः टेस्ट किट तयार याना परिक्षण यायेत सफल जुइ। जब कि चीनयाके छन्हुया १६ लाख परिक्षण यायेगु क्षमता दुगु जुया अन भाइरसं थ्यूपिन्त याकनं आइसोलेसन यायेत चीन ताःलात।

कोरोना या हुनिं अमेरिका गुलि परनिर्भर धैगु यच्चुक क्यनाबिल। अलय् परनिर्भर जुइगु गुलि ग्यानापु धैगु नं क्यनाबिल । न्यूयोर्क य् पोर्टअथोरिटिया इन्सपेक्टर हे कोरोना ग्रस्त जुल । डोनाल्ड ट्रम्पया सतिम्ह सिनेटर टेड क्रुज नं कोरोनाग्रस्त बिरामी नाप ल्हाः मिलेयाःगुलिं क्वारेन्टाइन य् च्वनेमाल। व मनू नं ल्हा मिलेयाम्ह मेम्ह छम्ह वना ट्रम्पनाप नं ल्हाः मिलेयाना ब्यूगुलिं कोरोना ट्रम्पयात नं पुन जुइ धैगु हुइनाभुइना दु ।

अमेरिका आः चीनं थें कोरोना नियन्त्रण याये मफैगु अवस्थाय् थ्यनेधुंकल । चीनय् छगू प्रोभिन्सय् जक महामारी जूगु खः, इमिसं लकडाउन याना मेगु प्रोभिन्स दक्वं बचेयात, तर अमेरिकाय् ३५ राज्य य् कोरोना न्यनेधुंकल । लकडाउन याना नियन्त्रण यायेगु असम्भव जुइधुंकल । व हिसाबं अमेरिका नं भयावह प्रकोपया लुखाय् दनाच्वंगु आभाष जुइ।

थजाःगु अवस्था अमेरिकाय् दु धाःसा परिक्षण मजुइगु, बिरामी अस्तालं बिस्यु वनीगु, आदि जुयाच्वंगु नेपालय् कोरोना या प्रकोप दु मदु धका बहस यायेगु हे बेकार।

खँ थुइकादिसँ , वास्तविकता सिइका दिसँ।