मिस नेवा: पोखरा ११४० या ब्वतिका:मिपिन्त यें महानगर व किपू नगर पालिकां देय् चाहिकल

येें/ नेवा: सम्पदा संस्कृति अध्ययन यायेत स्वनिग: चाह्यु व:गु मिस नेवा: पोखरा ११४० या ब्वतिका:मि मयजुपिन्त यें महानगर पालिकां यें विश्व सम्पदा क्षेत्र लायकू लागा व स्वयम्भू चाहिकल ।
थ्व हे झ्वलय् थौं सोमबाा: यें महानगर पालिका हनुमान ढोका दरबार बिकास समिति पाखें प्रमुख रोशनमान , वडा अध्यक्षपिं बालकृष्ण श्रेष्ठ ,शशिलाल श्रेष्ठ , मचाराजा महर्जन , राजेन्द्र मानन्धरं अध्ययन भ्रमण व:पिं मयजुपिन्त कुमारी छें लसकुस यासें जीवित देवि कुमारीया दर्शन याकुगु ख: ।
अनं लिपा यें लाय्कू लागा: , संग्रहालय , गद्दी बैठक लिसें भुखाचं स्यंगु मरु सत: , माजु देयग: लगायत सम्पदा पुननिर्माण ज्यायाबारे जानकारी बिसें चाहिकेगु ज्या या:गु ख: धासा सनिलय् स्वयम्भूइ चाहिका: नेवा: भ्वय् नकूगु ख: ।
थुगु ज्याझ्वलय् नेवा: मूर्त अमूर्त सम्पदा बारे महानगर पालिकाया सम्पदा समितिया कजिलिसें वडां नं १८ या अध्यक्ष न्हुछेकाजी महर्जनं सकतां खँ ल्यंका तयेया नितिं न्ह्यागु नं खँ पुस्तान्तरण जुयावने मा: धैगु खँ तसें मिस नेवा: ब्वति कयादीपिं थज्यागु ज्याय् ता:लायेमा धैगु खँ तयादीगु ख: । ज्याझ्वलय् नेवा: खल: कास्कीया महासचिव सुबिन्द्र श्रेष्ठं ग्वाहलिया नितिं महानगरयात सुभाय् देछासें मतिनाया चिं ल:ल्हानादीगु ख:।
अथे हे न्हिनय् वंघ: आजुद्यो खल: पाखें आजुद्यो दर्शन व वंघ: आजुद्योया बारे ब्वतिका:मिपिन्त कजी शरद डंगोलं जानकारी बियादीगु ख: ।
थ्वयां न्ह्य: चाह्यु व:गु मयजुपिनि पुच:यात किपू नगर पालिकां किपू देय् चाहिका थीथी थाय या जानकारी बिसें देय् पुखुसिइ छगू ज्याझ्व: याना मेयर रमेश महर्जनं लसकुस या:गु ख: । ज्याझ्वलय् थीथी वडाया अध्यक्षपिंलिसें स्थानीय पत्रकार पर्यटन व्यवसायीपिं नं झायादीगु ख: ।