इतिल्हने सम्यक महादान पर्व छ्गू चिन्तन

सुगतरत्न सिन्दुराकार
न्यादँय् छक्वः नागबहालय् न्याय्कीगु इतिल्हने सम्यक महादान पर्व फागुन १४ व १५ गते न्ह्याका तःजिक न्यायेकेत्यंगु  दु । थुगु सम्यक महादानय् नेवाःतसें सम्यक महादानया महानपर्व वाःचाय्का तसकं हे उत्साहजनक रुपं ब्वति कायेगु याना वयाच्वंगु खः । सम्यकय् जूगु सहभागितां हे सम्यकया महिमा गुलि दु धकाः क्यंगु दुसा सम्यकप्रति थौंतकं नं आस्था व विश्वास तसकं हे च्वन्ह्याः धैगु सिइ दु । सम्यकया व्यवस्थाय् गनं गनं छुं कथंया कमि कमजोरी दःसां तविनं समग्र रुपय् धाय्गु खःसा सम्यक महादानं श्रद्धालुपिन्त लय्ताय्केगु ज्या याना वयाच्वंगु दु ।
धर्म याय् धालकि तसकं हे मन क्वसापिं नेवाः बौद्धत उकिसनं सम्यकथें जाःगु आदर्शं भयब्यूगु ज्याझ्वलय् ब्वतिकया थःगु चित्तयात गुकथं परिमार्जन याना धकाः ध्यान धाःसा मब्यूसें मगाना नं वयाच्वंगु दु । सम्यक महादान खाली रहरबहर व मनोरञ्जनया निंतिं पक्का नं मखुगुलिं सम्यकय् ब्वति काःपिं द्यः खलः, व्यवस्थापन समिति व सर्वसाधारण श्रद्धालु भक्तजनपिन्सं तकं थुकिया सन्देशयात बांलाक कय्च्याय्गु बानी दय्केत स्वय्माःगु आवश्यक जुयाच्वंगु दु । सम्यक महादान हे छगू जीवन सुधारया लँपु व चित्त शुद्धिकरणया आधार जूगु हुनिं याना सम्यकयात खाली धर्मकथंया रुपय् साधारणकथं थुइकेगु ज्या याय्गु उचित मखु । छाय् सम्यकं चर्तुव्रम्ह विहारया रुपय् दुगु मैत्री, मुदिता, करुणा व उपेक्षाया भावनायात कःघाना वयाच्वंगु नं खनेदु
सम्यक महादानय् ब्वति काःपिन्सं थःत बांलाक शुद्धिकरणय् विकास याना यंकेफय्केमाःगु ला जू हे जुल नाप नापं चर्तुब्रम्ह विहारयात नं वांलाक वाःचाय्का भावना याना वनेमाःगु आवश्यक जुयाच्वंगु दु । न्ह्याग्गुं नं तःधंगु ज्याया तःधंगु हे आज्जु दयाच्वनिगुलिं सम्यकया आज्जुयात साकार याय्या निंतिं खाली ग्वसाः खलकं जक मखु श्रद्धालु भक्तजनपिन्सं नं उतिकं हे जिम्मेवारी वहन याना न्ह्याःवनेगु ज्या याय्माः । थुकथंया ज्यां जक सम्यक न्याःगुया सार्थक जूवनि । थुकथं याकेया निंतिं ग्वसाः खलःपिन्सं भक्तजनपिन्त हे बांलाक सन्देश वनिकथंया पलाःछिना बिइमाःगु आवश्यक जू । उकिं ग्वसाःखलःपिन्सं सम्यकप्रति गुकथंया कार्यदिशा दय्का न्ह्याःगु खः, थुकि गुलि तक सफल जुल व सम्यकया आदर्शयात गुलि तक सार्थक याय्फत धैगु नं समीक्षा नं याना वनेमाःगु खनेदु । सम्यक न्याय्कां जक तःधं मजुइगुलिं थुकिया दर्शन पक्षयात नं बांलाक वाःचाय्का न्ह्याःवनागु दु मदु थ्व नं छगू तःधंगु हे सवाल जूगुलिं कमजोरी पक्षयात आत्मसात् याय्फत धाःसा जक कन्हय्या न्हिस अझ बांलाक ज्या याना वनेफइगु निश्चित दु ।
इतिल्हने सम्यक महादानय् दान काःविज्यापिं शाक्य, बज्राचार्यपिन्त धू मब्वइगु थासय् व्यवस्था याना फ्यतुका तय्गु ज्या याना दान प्रदानया ज्या याकनं न्ह्याकेगु पलाः याय्माःगु खनेदु । न्हापा न्हापाया इतिल्हने सम्यकय् दान काः विज्यापिं शाक्य बज्राचार्यपिन्सं आपालं धुं ब्वःगु फय् तकं माःगु खः । थुकथंया अवस्था आपालं भुक्तभोगीपिनिगु मनय् वंगु दु । आदर्श भावनां न्ह्याकेमाःगु सम्यकथें जाःगु ज्याय् चित्तयात न्ह्योने तयाः न्ह्याक्को हे दुःख, कष्ट स्यूसां तविनं दान प्रदानयात प्राथमिकता बिया वनेमाःगु खनेदु । उकिं व्यवस्थापन पक्षयात चुस्त दुरुस्त याना तय्या नितिं योजनावद्धरुपं न्ह्यावनेगु ज्या जुयाच्वनेमाःगु दु । यदि थुकथं मजूया वन धाःसा ग्वसाःखलःप्रति हे अनास्था तकं ब्वलना वनेफूगु प्रति नं सचेत जुइमाःगु खनेदु । खास याना सम्यक महादानया ज्या खँ धैगु करबर मकासें देय्या हे गौरवकथं कया लोकयात उद्धार याय्गु लँपुकथं नाला वनेमाःगु ज्या खँ खः । लोकया हित याय्गु धकाः हे सम्यक महादानया ज्या न्ह्याकेगु खः । नाप नापं उदार भावयात व्वय्गु नं खः ।
थुगुसी २०७६ सालया इतिल्हने सम्यकय् धाःबाजं ब्वज्या छगू नं तँसा ज्याझ्वःया रुपय् न्ह्योने व्यय्गु योजना ग्वसाः खलःपिन्सं ग्वयाच्वंगु दु । थुकियात मनोरञ्जन खः वा आवश्यकता गुकथं स्वय्गु धैगु नं छगू न्ह्यसः दं वयाच्वंगु दु । सम्यकथें जाःगु ज्याझ्वःया न्ह्योने मेगु गुगुंकथंया ज्या याय्गु धैगु सम्यक महादानया महिमायात हे म्हो यायगु जक मखुला धैगु नं सः पिदनीगु स्वभाविक जुया वयच्वंगु दु । खः । सम्यक महादान धैगु हे दानपारमिता नाप स्वानाच्वंगुलिं दानपारमितायात तिबः जूवनिकथंया ज्या बाहेक सुयातं लय्ताकेगुकथंया ज्या सम्यक महादानथें जाःगु आदर्शं भय्ब्यगु ज्याय् ल्वाक छ्याय् मजूगु थें नं खनेदयाच्वंगु दु । तर ग्वसाः खलःपिन्सं थुगु कथंया बाजं व्वज्यायात गुकिथं परिभाषित यानादी थ्व धाःसा स्वय् वाकी हे दुनि ।
सम्यक महादानया ज्या न्ह्यानाच्वंबलय् हे मंकाः धाःबाजं ब्वज्या न्हापायागु सम्यकय् याःगु खः । थुगु दँय् नं याइगु जूगु दु । थुग ज्या सम्यकया इलय् हे छाय् यात धैगु छगू तःधंगु न्ह्यसः नं दना वयाच्वंगु दु । थुगु धाःबाजं ब्वज्याया झ्वलय् हे न्हापा बाजंया गुरुपिन्त हनेज्या नं याय्गु ज्या न्ह्याकूगुलिं गनं थ्व ब्वज्या धैगु हे सम्मान कालबिलया ज्या जकं जूवंगु मखुला धैगु तकं न्ह्यसः मदनि धाय् थाकु । उकिं उकिं सम्यक थें जागु ज्याझ्वलय् ग्वसाः खलःपिन्सं मान सम्मान स्वया सिवें नं सम्यकया गौरवयात, आदर्शयात, दशपारमितायात, लोभ, मोह, दया, करुणा लगायत बु्द्धया उपदेशयात विशेष बःबियाच्वने माःगु दु । इतिल्हने सम्यक ज्याझ्वःया विषयवस्तुं छगू लक्ष्य ज्वनाच्वंथाय् हानं मेगु हे लक्ष्यया ज्या न्ह्योने न्ह्याकेबलय् थुकथंया पलाखं बांलागु सिबें नं बांमलाःगु सन्देश वना कन्हय्या न्हिस सम्यकया ग्वसाःखलःया सोचय् तकं न्ह्यसः चिं ब्वलनीगु जकं मखुला धैगु शंका खनेदु । उकिं गुगुं कथंया ज्याझ्वः न्ह्याकेबलय् बांलाक विचाः याना न्ह्याकेगु ज्या मयाना वन धाःसा थुकिं बांलागु लिच्वः पिदनाच्वनी मखु ।