मच्छिन्द्र ए डिभिजन लिग च्याम्पियन, आर्मी १-० ले पराजित

काठमाडौं/ सम्पदा महानगर काठमाडौंको पुरानो शहरको मध्यभागमा रहेको  सानमिगेल मच्छिन्द्र युथ क्लबले सहिद स्मारक ए डिभिजन लिगको उपाधि उचालेको छ । त्रिभुवन आर्मी क्लबलाई १–० ले हराउँदै मच्छिन्द्रले पहिलो पटक लिगको उपाधि उचाल्न सफल भएको हो । टीम घोषणासँगै यसपालि लिग जित्ने दाबीका साथ मैदानमा उत्रिएको राष्ट्रिय खेलाडीहरुले भरिएको टीम मछिन्द्र क्लब आफ्नो दावेदारीलाई वास्तविकतामा बदल्न सफल भएकोमा निकै हर्षित रहेको छ ।
त्रिपुरेश्वरस्थित दशरथ रङ्गशालामा शनिबार सम्पन्न खेलमा मच्छिन्द्रले जित्नैपर्ने बाध्यताको दबाबका बीच त्रिभुवन आर्मीमाथि जित हात पार्न सफल भएको हो । मच्छिन्द्र यसअघि लिगको २०७० को संस्करणमा उपाधिको होडसम्म पुगेपनि उसको पहिलोपटक उपाधि जित्ने सपना पुरा हुन सकेको थिएन ।
मच्छिन्द्रको जितमा रञ्जित धिमालले गर्नुभएको प्रहार आर्मीका विकास तामाङले रोक्दा गोलकिपर विकेश कुथुलाई छल्दै गोलमा परिणत भएको थियो । उक्त आत्मघाती गोल निर्णायक रह्यो । धिमालले ३३ औं मिनेटमा देब्रे कर्नरबाट गर्नुभएको प्रहार तामाङबाट डिफ्लेक्ट हुँदै आत्मघाती गोलमा परिणत हुन पुग्यो । धिमालको फ्रिकिक विकास गुरुङबाट उछिट्टिएर गोलमा परिणत भएको हो ।
लिगमा मच्छिन्द्रका प्रशिक्षक प्रवेश कटवाल उत्कृष्ट प्रशिक्षकको उपाधिबाट सम्मानित भएका छन् ।
मच्छिन्द्रका विशाल राई लिगमा उत्कृष्ट मीडफिल्ड घोषित भए थ्री स्टारका अनन्त तामाङ उत्कृष्ट डिफेन्स घोषित भए। मनाङ मस्र्याङ्दी क्लबका दीप कार्की उत्कृष्ट गोलकीपरको उपाधिबाट सम्मानित भएका छन् । न्यूरोड टिमका दर्शन गुरुङ लेफ्टीनेन्ट मणि विक्रम शाह युवा खेलाडी पुरस्कारबाट पुरस्कृत हुनुभएको छ । ललितपुरको थ्री स्टार क्लब ‘फेयर प्ले अवार्ड’बाट सम्मानित भएको छ । त्रिभुवन आर्मी क्लबको पोल्टामा भने उत्कृष्ट फरवार्डको उपाधि गयो । भरत खवास उत्कृष्ट फरवार्ड घोषित भए ।
उनीहरु सबैलाई अखिल नेपाल फुटबल संघले दशरथ रङ्गशालामा एक समारोहको आयोजना गरी सम्मान गरेको थियो ।
काठमाडौंमा रहेका पुराना क्लबहरु अन्नपूर्ण , आरसीटी , एनआरटी, बालकुमारी , एनआरटी , संकटा, मछिन्द्र क्लब एक किलोमीटरको पेरिफेरिमा रहेका ए डिभिजनका क्लबहरु हुन् जुन एक समय निकै चर्चित थिए । आज मछिन्द्रले यस क्षेत्रको पुरानो इतिहास सम्झाइदिएको छ ।
तर पहिले खेलाडीहरु स्थानीय नै हुन्थे भने अहिले खेलाडी प्राय: देशीविदेशी समेत रहेका छन् ।
मछिन्द्र ए डिभिजन च्याम्पियन बन्न सफल भएकोमा सुभाय् मिडिया परिवार शुभकामना व्यक्त गर्दछ ।