धुतङ्गधारीहरु लुम्बिनीसम्मको शान्ति पदयात्राको निम्ति स्वयम्भूबाट हिंडे !

काठमाडौं /थाइल्यान्डका धुतांगधारी बौद्ध भिक्षुहरुले स्वयम्भूदेखि लुम्बिनीसम्मको पदयात्रा सुरु गरेका छन् ।
काठमाडौंको स्वयम्भूस्थित आनन्दकुटी बिहारबाट ६० जना भिक्षुहरु लुम्बिनीको निग्लिहवासम्मको शान्ति पदयात्राको निम्ति फागुन १ गते बिहान निस्केका हुन् ।
शान्ति पदयात्राको क्रममा उहाँहरुले सबैभन्दा पहिला स्वयम्भू महाचैत्य परिक्रमा गरि बुद्ध पुजा गरेर हिंड्नुभएको थियो ।
पहिलो दिन धुतांगधारी भिक्षुहरु बौद्धमा जानुभएको र त्यहाँ पनि बुद्ध पुजा गर्नुभएको थियो भने नर: बुद्ध विहारमा भोजन दान गरिएको थियो ।
यस पदयात्रामा स्वयम्भूदेखि लुम्बिनीसम्म शान्तिदीप पनि साथै लगिने र साँझपख बास बस्ने विभिन्न स्थानमा शान्तिदीप प्रज्वलन गर्न स्वयम्भूबाटै शान्तिदीप बालेर हिंडेका थिए ।
बौद्ध दर्शनमा धुतको अर्थ हो परिसुद्ध , पवित्र भन्ने हो जुन बौद्ध भिक्षुहरुको शीलाचरणको अभिन्न अंगको रुपमा रहेको हुन्छ ।आफूले पालन गर्ने शीलाचरण परिशुद्ध गरेर क्लेशलाई नाश वा क्षय ज्ञान भएको हुनाले नैं धुताङ्ग भनिन्छ । जसले आचरण गर्छ उसलाई धुताङ्गधारी भनिन्छ ।
काठमाडौं स्वयम्भूबाट सुरु भएको पैदल यात्रा आगामी फागुन २० गते मंगलबार कनकमुनी बुद्धको जन्म भएको स्थान निग्लिहवा पुगेर शान्तिपदयात्रा समापन गरिनेछ ।
शान्ति पदयात्रा थाइल्यान्डका भिक्षु सोमछाइ महास्थविरको नेतृत्वमा हिंडेको हो ।
विश्व शान्तिको कामना लिएर हिंडेको यो पदयात्रा कार्यक्रमले दैनिक २५/३० किलोमीटर हिड्ने लक्ष्य लिइएको छ ।
यस क्रममा आवश्यक बस्ने सुत्ने लाउने सामानहरु भिक्षुहरु आफैंले बोकेका छन् ।
पहिलो ४ दिन काठमाडौं उपत्यकाका विभिन्न स्थानमा पदयात्रा गर्ने कार्यक्रम रहेको छ भने बौद्ध तीर्थस्थलहरु बौद्ध सम्पदाहरु भएर पदयात्रा गरिने छ भने त्यस्ता स्थानहरूमा बुद्ध पुजा धर्म देशना समेत गर्ने कार्यक्रम रहेको बताइएको छ ।
यस शान्ति पैदल यात्राले ४१५ किलोमिटरको दुरी तय गर्नेछ ।