नेवाः मोर्चाया स्वक्वःगु राष्ट्रिय सम्मेलन , पवनमायात हाकनंं नाय:

येँ, सिल्लाथ्व पुन्हि आइतवाः । नेवाः राष्ट्रिय मुक्ति मोर्चा नेपाःया स्वक्वःगु राष्ट्रिय सम्मेलन स्वन्हु यंक तःजिक जूगु दु । शुक्रवाः येँ शान्तिबाटिकां छगू र्‍यालीं नगर परिक्रमायासे असनय् थ्यंकाः सभाय् हिलाः उलेज्या याःगु खः। शनिवाः क्वपुँद्वंस बन्दसत्र याःगु खः । आइतवाः उगुहे थासय् समापन ज्याझ्वः याःगु खः ।
उगु ज्याझ्वलं पवन मान श्रेष्ठया नायःसुइ ३१ म्हसिगु न्हूगु केन्द्रीय समिति नीस्वंगु दु । अधिवेशनंं ‘नेवाः राजनीति’ व ‘नेवाःतय्गु विकास व आःयागु स्थिति’ निगू डकुमेण्ट नं पास याःगु दु । रणनीति हिसाबं नेवाः राज्ययात काःगु दु  धा:सा कार्यनीति हिसाबं नेवाः तय्गु भाषा, तजिलजि, लजगाः, छेँ–बुँइ जुयाच्वंगु अतिक्रमणया विरुद्ध संघर्ष न्ह्याकायंकेगु नापनापं थीथी संघर्षशील नेवाः खलःपुचःत नाप सहलह ब्याकाः नेवाःतय्गु विकास व संरक्षणया नितिं सहकार्य यानावनेगु नीति क्वःछ्यूगु मोर्चाया न्हूम्ह नायः श्रेष्ठं जानकारी ब्यूगु दु ।
किपा : नेवा: सूचना केन्द्र