नेपाल भाषा स्टार म्युजिक भिडियो अवार्डया ग्रायण्ड फिनाले त:जिक जुइगु !

यल/ नेवा:ख्यलय् जुइत्यंगु ऐतिहासिक अवार्ड ज्याझ्व: कथं बय् बय् जुयाच्वंगु नेपाल भाषा स्टार म्युजिक भिडियो अवार्डया ग्रायण्ड फिनालेयात कया: ग्वसा:खलकं छगू पत्रकार सम्मेलन यात ।
वंगु सोमबा: यलया बागडोलय् च्वंगु बेखाज पार्टी भेन्युइ पत्रकार सम्मेलन यासें ग्वसा: खल: संसार कृयसन्सं अवार्डया फिनालेया थीथी खँया जानकारी बिल ।
लुमंके बह:जू संकिपा नाय: स्वतन्त्र संसार महर्जनया संसार क्रियसन्सया ग्वसालय् वइगु माघ १० गते शुक्रवा: नेपालभाषा स्टार म्यूजिक भिडियो अवार्डस् ११४० या ग्राण्ड फिनाले ज्याझ्वःया येँया प्रज्ञाभवनया हलय् शहरी विकास राज्यमन्त्री रामबीर मानन्धरया मू पाहांसुइ जुइत्यंगु खँ छुं दिन न्ह्य: पित ब्यूगु ख: ।
नेवाः पत्रकार राष्ट्रिय दबूया संयोजनय् जूगु उगु पत्रकार सम्मेलनय् बरिष्ठ सिने पत्रकार निर्देशक विजयरत्न असंबरे, नेवाः पत्रकार राष्ट्रिय दबूया केन्द्रीय नायः सुरजवीर बज्राचार्य, नेवाः एचडी टेलिभिजनया प्रमुख नवीन जोशी, न्हापांम्ह मातृभाषाया संकिपा नाय: जय महर्जन , नेपाल चलचित्र कलाकार संघया उपाध्यक्ष पुलांम्ह कलाकार सानुकुमार ताम्राकार, अवार्ड ज्याझ्वःया सल्लाहकारपिं केशवराम सिंह व स्वयम्भूराज डंगोल पाखें अवार्डया ग्राण्ड फिनाले ज्याझ्वः सुथां लायेमाः धैगु मनंतुसें भिंतुना देछायेगु ज्या जूगु ख: ।
, “नेपालभाषा संकिपा इतिहासय् न्हापांगु व दकले तःधंगु व आपालं विधाय् अवार्ड वितरण यायेत्यंगु थुगु न्हापांगु छगू जक नेपालभाषा म्यूजिक भिडियो अवार्ड खः नेपालभाषा स्टार म्यूजिक भिडियो अवार्ड । थ्व अवार्ड विशुद्ध नेपालभाषा कलाक्षेत्रय् समर्पित श्रष्टापिनिगु सम्मानार्थ लःल्हायेगु जूगुलिं थ्व थःगु हे कथं महत्वपूर्ण जू ।”
मनोनयनय् लाःपिं सर्जक कलाकारपिं थःथम्हं हे अवार्डया दावेदार खः । उकिं अवार्ड ल्हातय् मलाःसां गुलि नं संकोचित मजूसे वइगु दिंया नितिं अझ प्रभावकारीकथं न्ह्यज्यायेगु जोश, जाँगर ज्वनाः थुगु अवार्ड ज्याझ्वः सुथां लाकेगु नितिं ल्हातय् ल्हाःमाः हनाः सहभागिता क्यनी धैगु पूर्ण विश्वास कयागु दु ।” धैगु खँ न्ह्यथना: छगू प्रेस विज्ञप्ति नं ग्वसा:खलकं पितब्यूगु दु ।
अवार्ड ग्वसा:खल:या कजि स्वतन्त्र संसारं उगु अवार्डया सर्वोकृष्ट श्रष्टा ल्ययेगु नितिं न्हयम्ह दुजः दुगु निर्णायक मण्डल पुचः नीस्वनागु जानकारी बिसें उगु निर्णायक मण्डलया निष्पक्ष निर्णय व सकल भोटर्सतय् अनलाइन भोटिङ्ग व एसएमएस भोटिङ्गपाखें आधारलिसें उत्कृष्ट श्रष्टा ल्ययाः सर्वोत्कृष्ट, प्रोत्साहन सिरपा , पब्लिक च्वाइस अवार्ड , पपुलर अवार्ड लिसें जुरि अवार्डया पाखें हनीगु बिधा नं थप जुइगु खँ कनादीगु ख: ।
अथेहे पुलांपिन्त सम्मान व न्हूपिन्त प्रोत्साहन यायेगु आज्जुया लिसें संसार लाइफटाइम एचिभमेन्ट अवार्ड बरिष्ठ संगीतकार व सांगितिक व्यक्तित्व अमरराज शर्मा राजोपाध्यययात १५,००० तका लिसें सम्मान यायेगु अले संसार सप्तरंगी सम्मानय् बरिष्ठ कलाकार निर्देशक लेखक पवन जोशी, बरिष्ठ संगीतकःमि मनराजा नकःमि, वरिष्ठ सिने पत्रकार ,निर्देशक विजयरत्न असंबरे, न्हापांम्ह नाय: जय महर्जन ,नकिं हिसिला महर्जन पुलांम्ह लोजंह्वा:म्ह गायक जुजुकाजी रंजित व पुलांम्ह मेकअप आर्टिष्ट सनमकुमार श्रेष्ठयात लःल्हायेगु लिसें संसार मल्टिपर्पोज सम्मान नेवाः संचारक:मि ललेन्द्र शाक्ययात लःल्हायेगु जानकारी कजि महर्जनं बियादिल ।
अवार्ड ज्याझ्व:या फेसबुक प्रोफाइल पिक्सचर्सय् टेम्प्लेट फ्रेम तयाः द्वःछिं मल्याक्क भ्यूअर्सं दयेकेत ताःलाःपिं कलाकार राजु महर्जन व सरिता बज्राचार्यया नां नं उगु ज्याझ्वलय् सार्वजनिक या:गु ख:।