न्हूदँ सांस्कृतिक र्‍यालीया निंतिं बाजं खलःतय्त इनाप

येँ, कौलागा चतुर्दशी । न्हूदँया लसताय् येँय् जुइगु वृहत् साँस्कृतिक रयालिइ ब्वतिकायेत ब्वनापौ बिइथें व आः वइगु मंगलबार नेसं न्हूदँ पारुकुन्हुया रयालिइ ब्वतिकायेत येँया स्वीगू स्वयाःयाक्क बाजं खलःतय्त सःताः न्हूदँ समारोह समितिं छगू ज्याझ्वः यात ।
ज्याझ्वलय् येँ महानगरपालिकाया प्र्रमुख विद्यासुन्दर शाक्य, उपप्रमुख हरिप्रभा खड्गी श्रेष्ठ व मेमेपिन्सं खलः पुचःया प्रतिनिधिपिन्त दुतिनापौया फारम लःल्हाःगु खः ।
न्हापाया सालय् साँस्कृतिक रयालिया निंतिं दक्व खलःपुचःपिन्त दापा बाजं खलःयात किपू बिया तये धुंकूगु खःसां लिपा नेपालभाषा मंकाःखलःया नायः पद्म रत्न आकाझाकां मदुगु व साँस्कृतिक रयालि हे दिकेमाःगु धकाः निर्णय जुइवं अबलय् रयालि मन्ह्यात । उगु दँय्या केपु बियातय्धुंकूलिं थ्व सालय् उकि भचा मेगु थप बिइगु निर्णय जूगु आयोजकपिनिपाखें जानकारी वःगु दु ।
ज्याझ्वलय् संयोजक पवित्र कसाःनं न्हूदँया साँस्कृतिक रयालि धइगु देय्या हे ततःधंगु राजनीतिक परिवर्तनया कारक नं जूगु अले थ्व हे रयालि यानाः सरकारं नेपाल संवत्यात राष्ट्रिय संवत धकाः मान्यता बिइगुधुंकूगु खँ लुमंकाः बाजं खलः धइगु नेवाःतय्गु संस्कृतिया हे पहिचान जूगुलिं सकलसित उलि हे उत्साह ज्वना ब्वतिकायेत इनाप यानादिल । लिसें वय्कलं सकलसित नेवाः वसः पुनाः वःथें नेवाः भासं खँ नं ल्हायेत अले भिंतुना सभा ज्वःछिसहभागी जुयाः राज्यलिसे झी नेवाःतय्सं माग यानावयाच्वंगुया खँया जनकारी कयाच्वनेत नं धयादिल ।
अले न्हूदँ समारोह समितिं रयालिइ छुं हे पंगः मवयेक न्हयाये माः धकाः नासः पुजा याःगु अले उकिया प्रसाद ग्रहण नं उगु ज्याझ्वलय् जुल ।

source: jheegu.com