त:जिगु ज्याझ्व: दथुइ – “छंगु जिगु माया रतन” मुहुर्त लिसें “सरप्राइज” पिथना

यें/छगू त:जिगु ज्याझ्व:या दथुइ “छंगु जिगु माया रतन”या मुहुर्त अले सरप्राइज म्येचा पिदंगु दु ।
सुखावति मल्टी प्रोडक्सन प्रा.लि.या न्ह्यब्वया दुगु नेवा: शोम्यान कथं म्हसीका बीत ता:लाम्ह सुरेन्द्र तुलाधरया संकिपा “छंगु जिगु माया रतन” न्हूकथं मुहुर्त यायेगु ज्वाझ्व: येंया लुतिइ च्वंगु प्याराडाइज ब्यांकेतय्  जुल । ख्यालिजुजु मदन कृष्ण श्रेष्ठया मूपाहांसुइ जूगु उगु ज्याझ्वलय् नेपाल भाषा ख्य:नापं राष्ट्रिय संकिपा ख्य:या संकिपाक:मिपिं नं यक्वसिनं ब्वति कयादिइगु ख: ।
थुगु संकिपाय् सरोज श्रेष्ठ व लजना महर्जनयात इन्ट्रोड्युस यासें निर्देशक तुलाधरंं नेवा: संकिपा ख्यलय् न्हू हिरो हिरोईनयात पलिस्था यायेगु कुत: यानादीत्यंगु खनेदु । संकिपाया बाखँ निर्देशक थम्हसिनं च्वयादीगु ख: धा:सा थुकिया संगीतकार नील शाक्य जुयादी । गोविन्द महर्जन , बिष्णुरत्न तुलाधर , गोपाल काजी कायस्थ ,कविता श्रेष्ठ रजना जोशी , उत्तम प्रधान , बुद्ध शाही लिसें डा. बलराम श्रेष्ठ थुगु संकिपाया निर्मातापिं ख: ।
अथे हे ज्याझ्व:या न्हापांगु ब्वय् दीपा महर्जनया एकल म्येचा: “सरप्राइज” विमोचन ज्याझ्व: जूगु ख: । मूपाहां ख्यालिजुजु मदनकृष्ण श्रेष्ठ व दीपा महर्जनया संगीत गुरु वीरप्रसाद भंसारीं संयुक्त रुपं उगु म्येचा: विमोचन यानादीगु ख: ।
सरप्राइज म्येचा: विमोचन झ्वलय् दीपा व यमन श्रेष्ठया ज्व:म्येलिसें दीपाया एकल गायन नं न्ह्यब्वयेगु ज्या जूगु ख: । म्येचालय् नील शाक्य , यमन श्रेष्ठ , सुरेन्द्र तुलाधरया संगीत व जीवित जल्मी, भुपेन्द्र बज्राचार्यया संगीत संयोजन दुगु थीथी म्येत दुथ्याका त:गु दु ।

संकिपा मुहुर्त व म्येचा: पिथना ज्याझ्वलय् सुखावतिमल्टी प्रोडक्सन पाखेंं यानाव:गु ज्या बारे खँ तयेगु झ्वलय् नाय: सुरेन्द्र तुलाधरंं थ:पिं संकिपा संगीतलिसें कलाकारतय् हितया खँय् पला: न्ह्याकाच्वनागु खँ कनादीगु ख: ।