माल्दिभ्समाथि जितसँगै नेपाल फाइनल नजिक

काठमाडौं, मङ्सिर २१ गते । तेह्रौं दक्षिण एसियाली खेलकुद(साग)को पुरुष फुटबल विधामा नेपालले माल्दिभ्समाथि जित हात पारेको छ । जितसँगै नेपालले साग पुरुष फुटबलको फाइनल नजिक पुगेको छ । नेपालले लिग चरणमै आइतबार बङ्गलादेशको सामना गर्दैछ । बङ्गलादेशसँग जित हारले नेपालको फाइनल यात्रा तय हुनेछ । यद्दपी नेपाल तीन खेलबाट सात अङ्कसहित शिर्ष स्थानमा उक्लिएको छ । नेपालले बङ्गलादेशलाई बराबरीमा रोकेपनि फाइनलका लागि स्थान सुनिश्चित गर्नेछ । आजै हुने श्रीलङ्का र भुटानबीचको खेलले भुटानको फाइनल यात्राबारे टुंगो लगाउनेछ ।
नेपालले तीन खेलमध्ये दुईमा जित हात पारेको छ । श्रीलङ्का विरुद्धको खेल बराबरीमा रोकिदा नेपाल अङ्क बाँड्न बाध्य भएको थियो । नेपालले भुटान र माल्दिभ्समाथि जित हात पारेर तीन खेलमा सात अङ्कसहित तालिकाको शिर्ष स्थानमा उक्लेको छ । भुटानले भने तीन खेलबाट छ अङ्क बटुलेको छ । उसले पहिलो खेलमा बङ्गलादेश र तेस्रो खेलमा माल्दिभ्समाथि जित हात पारेको थियो । नेपालसँगको खेलमा भने २–१ ले हार बेहोर्यो ।
त्रिपुरेश्वरस्थित दशरथ रङ्गशालामा सम्पन्न खेलमा नेपालले माल्दिभ्समाथि २–१ को जित हात पारेको छ । नेपालका लागि अभिषेक रिजाल र अनन्त तामाङले एक एक गोल गर्नुभयो । सुरुमा कमजोर देखिएको नेपाली रक्षात्मक पद्धतीको फाइदा माल्दिभ्सले उठायो । उसले पहिलो हाफको १८ औं मिनेटमा गोल गर्दै घरेलु टोलीमाथि दबाब सृजना गरेको थियो । इब्राहिम महुदीको गोलमा माल्दिभ्सले नेपालमाथि १–० को अग्रता लियो । त्यसअघि ११ औं मिनेटमा सुजल श्रेष्ठले गर्नुभएको प्रहार क्रसबारमा लागेर फर्किदा नेपालले अग्रता लिनबाट चुक्यो ।
निराश हुन लागेका नेपाली खेल प्रशंसकलाई पहिलो हाफमै गोल गरेर अभिषेक रिजालले खेल बराबरीमा ल्याउनुभयो । उहाँले ४३ औं मिनेटमा पेनाल्टी क्षेत्र बाहिर बललाई नियन्त्रणमा राख्दै गर्नुभएको प्रहार गोलमा परिणत भयो । त्यसअघि ४२ औं मिनेटमा अभिषेक रिजालको पासलाई सुजल श्रेष्ठले सुनिललाई दिएपछि उहाँको प्रहारलाई माल्दिभ्सका गोलरक्षक हुसेन सरीफले विफल तुल्याउनुभयो ।
दोस्रो हाफ सुरु भएको पाँच मिनेट नबित्दै अनन्त तामाङले नेपाललाई अतिआवश्यक अग्रता दिलाउनुभयो । उहाँले ५४ औं मिनेटमा हेडरमार्फत गोल गर्नुहुँदै नेपाललाई २–१ को अग्रता दिलाउनुभयो । उक्त अग्रताले नै नेपाललाई माल्दिभ्समाथि २-१ को जित दिलाउन पर्याप्त भयो ।

courtesy