नेपाल संवत् न्हूदँ राष्ट्रिय समारोह समिति ११४७को अध्यक्षमा दक्ष प्रशासक सुगतरत्न कंसाकार

काठमाडौं — नेपालका कुशल तथा दक्ष प्रशासक सुगतरत्न कंसाकारलाई नेपाल संवत् न्हूदँ राष्ट्रिय समारोह समिति  ११४७ को अध्यक्ष चयन गरिएको छ।

गत शुक्रबार काठमाडौंको नेपा: ब्यांक्वेटमा आयोजित नेपाल संवत् न्हूदँ ११४६ समारोह समितिको बैठकमा न्हूदँ ११४६ का नायः प्रेमहिरा तुलाधरले समितिको कार्यविधिअनुसार कंसाकारलाई न्हूदँ ११४७ को अध्यक्ष घोषणा गरेका हुन्।

कार्यक्रममा न्हूदँ संरक्षण समाजका संरक्षक प्रा.डा. नरेशमान बज्राचार्यले सुगतरत्न कंसाकार नेपालकै एक प्रतिष्ठित र दक्ष प्रशासक भएको उल्लेख गर्दै नेपाल संवत् नयाँ वर्षलाई राष्ट्रिय स्तरमा प्रवर्द्धन र प्रचारप्रसार गर्न विभिन्न क्षेत्रका व्यक्तित्वहरूको नेतृत्वमा वर्षेनि विविध कार्यक्रम हुँदै आएको बताए।

समारोहमा १०७ सदस्यीय नेपाल संवत् न्हूदँ ११४७ समारोह समिति तथा ३५ सदस्यीय सचिवालय गठन गरिएको छ। सचिवालयको पहिलो बैठकले विभिन्न जिम्मेवारी सम्हाल्न २० वटा उपसमिति गठन गरेको जनाइएको छ।

नेपाल संवत् ११४७ को न्हूदँ आगामी कछलाथ्व पारु अर्थात् २०८३ कार्तिक २४ गते परेको छ। सो अवसरमा नेपाल संवत् न्हूदँ राष्ट्रिय समारोह समितिको आयोजनामा येँस्थित वसन्तपुरमा परम्परागत भिन्तुना र्‍याली तथा भिन्तुना सभा आयोजना गरिने कार्यक्रम रहेको छ।