बाढीपछि ढुङ्गे बजार क्षेत्र ,देविघाट बजारमा सरसफाइ रहिलो र गेग्रान हटाउने काम तीव्र

नुवाकोट । भोटेकोशी हुँदै त्रिशूली नदीमा आएको बाढीले प्रभावित बनाएका विदुर नगरपालिका क्षेत्रका विभिन्न स्थानमा बाढीपछिको सरसफाइ, सडक खुलाउने तथा पुरिएका संरचना हटाउने कार्य तीव्र पारिएको छ।

बाढीले बगाएका तथा हिलो, माटो र गेग्रानले पुरिएका सडक, बजार क्षेत्र र विभिन्न संरचनाको सरसफाइ तथा व्यवस्थापन कार्य विदुर नगरपालिका मार्फत उपलब्ध गराइएको हेभी उपकरणको प्रयोग गरी भइरहेको छ।

विदुर नगरपालिका–५ स्थित देविघाट बजार क्षेत्रमा बाढीले थुपारेको हिलो र गेग्रान हटाउने तथा पुरिएका संरचना सफा गर्ने कार्य जारी छ। बाढीका कारण प्रभावित बनेका सडक तथा विभिन्न स्थानमा आवतजावत सहज बनाउन अवरोध हटाउने कामलाई प्राथमिकता दिइएको छ।

त्यसैगरी, विदुर नगरपालिका–१ स्थित ढुङ्गे बजार क्षेत्रमा पनि बाढीले बगाएका तथा हिलो र गेग्रानले पुरिएका संरचना हटाउने कार्य भइरहेको छ। नगरपालिकाले उपलब्ध गराएको हेभी उपकरण प्रयोग गरी प्रभावित क्षेत्रमा थुप्रिएको माटो, हिलो र गेग्रान हटाउँदै बजार क्षेत्रलाई क्रमशः सामान्य अवस्थामा फर्काउने प्रयास भइरहेको छ।

बाढीपछि पुरिएका बाटो तथा सडक खुलाउने, बजार तथा सार्वजनिक क्षेत्रको सरसफाइ गर्ने र क्षतिग्रस्त तथा अवरुद्ध संरचनाको व्यवस्थापन गर्ने कार्यलाई निरन्तरता दिइएको छ।

विदुर नगरपालिकाको पहलमा सञ्चालित सरसफाइ तथा पुनःस्थापना कार्यले बाढीबाट प्रभावित देविघाट र ढुङ्गे बजार क्षेत्रको जनजीवनलाई क्रमशः सामान्य अवस्थामा फर्काउन सहयोग पुग्ने अपेक्षा गरिएको छ।