एनआरएनएमा एकताको सन्देश: हेमराज शर्मा अध्यक्षमा सर्वसम्मत , रविनराज उपाध्यक्षमा रहने
सुभाय् संवाददाताMarch 16, 2026 मा प्रकाशित (२ दिन अघि) अनुमानित पढ्ने समय : १८ मिनेट
काठमाडौं, चैत २ / गैरआवासीय नेपाली संघ (एनआरएनए) को नेतृत्व चयनमा देखिएको अन्योल चिर्दै हेमराज शर्मा अध्यक्षमा सर्वसम्मत चयन भएका छन्। जारी ग्लोबल कन्फरेन्सको दोस्रो दिन साँझ दुई प्रमुख प्रत्यासी शर्मा र रविन राज बज्राचार्यबीच ऐतिहासिक सहमति जुटेपछि शर्मा निर्विरोध अध्यक्ष बनेका हुन्।
मञ्चबाटै भयो सहमतिको घोषणा
अध्यक्षका दुवै उम्मेदवारले सम्मेलनको बन्द सत्रको मञ्चबाटै एकताबद्ध भएर अघि बढ्ने घोषणा गरेका थिए। स्रोतका अनुसार, संघलाई विभाजनबाट जोगाउन र संस्थागत हितका लागि रविन राज बज्राचार्यले आफ्नो दाबेदारी फिर्ता लिँदै शर्मालाई समर्थन गरेका हुन्। सहमति अनुसार बज्राचार्य अब नयाँ कार्यसमितिमा उपाध्यक्षको जिम्मेवारीमा रहनेछन्।
पूर्ण कार्यसमिति नै सर्वसम्मत हुने संकेत
नेतृत्व तहमा भएको यो सहमतिले अन्य पदहरूमा पनि सहमतिको ढोका खोलेको छ। प्राप्त जानकारी अनुसार अधिकांश पदहरूमा नाम टुंगो लागिसकेको छ भने केही प्राविधिक विषयमा छलफल जारी छ। भोलिसम्ममा सबै पदहरूको नामावली घोषणा गरी पूर्ण रूपमा सर्वसम्मत कार्यसमिति ल्याउने तयारी भइरहेको छ।
विवाद अन्त्यको प्रयास
लामो समयदेखि आन्तरिक गुटबन्दी र विवादका कारण एनआरएनएको छवि धुमिल बनेको भन्दै साधारण सदस्यहरूले एकताको दबाब दिँदै आएका थिए। “संस्थालाई बचाउन र कार्यसम्पादन सहज बनाउन यसपटक निर्वाचन भन्दा पनि सहमतिको बाटो रोजिएको हो,” सम्मेलनमा सहभागी एक प्रतिनिधिले बताए।
यो सहमतिसँगै एनआरएनएभित्र नयाँ उत्साह पलाएको छ। विश्वभरका गैरआवासीय नेपालीहरूले यस कदमलाई संस्थागत सुदृढीकरणको दिशामा एउटा महत्वपूर्ण कोशेढुङ्गाका रूपमा लिएका छन्।