त्रिशूलीमा बाढीपीडित १०० परिवारलाई भिक्षु महासंघको नेतृत्वमा राहत सामग्री वितरण

त्रिशूली, भदौ २३ / भोटेकोशीमा आएको विनाशकारी बाढीबाट प्रभावित त्रिशूली क्षेत्रका बाढीपीडित परिवारलाई अखिल नेपाल भिक्षु महासंघको नेतृत्वमा राहत सामग्री वितरण गरिएको छ।

अखिल नेपाल भिक्षु महासंघको आयोजना तथा विभिन्न सहयोगी दाता र दातृ बौद्ध संघ–संस्थाको सहयोगमा भिक्षु उत्तमको नेतृत्वमा गएको टोलीले त्रिशूलीको पुरानो ऐतिहासिक बजारस्थित बाढीपीडित आश्रयस्थलमा रहेका १०० परिवारलाई आवश्यक राहत सामग्री वितरण गरेको हो।

राहतमा प्रेसर कुकर, कराही, थाल, चम्चा, पन्यु, चपिङ बोर्ड, चक्कु, पानीका जार, ब्ल्याङ्केट, लाइट, भित्री कपडा, तन्ना, रुमाल, औषधि तथा विभिन्न कपडालगायतका सामग्री वितरण गरिएको थियो।

राहत अभियानमा बुद्ध धर्मालय, फुकेत, थाइल्यान्ड लगायत विभिन्न बौद्ध संस्था तथा सहयोगी दाताहरूको साथ र सहयोग रहेको आयोजकले जनाएको छ।

यसै क्रममा त्रिशूलीमा खानेपानीको समस्या समाधानका लागि बुद्ध धर्म संघ जूम पुचःले करिब ३ हजार मिटर लामो र १ इन्चको पानीको पाइप सहयोग गरेको छ। त्रिशूलीमा खानेपानीका लागि पाइप आवश्यक रहेको जानकारी स्थानीय बासिन्दा श्रेष्ठ नवयुगबाट प्राप्त भएपछि उक्त सहयोग जुटाइएको जनाइएको छ।

Trishuli bajar before flash flood

\

बुद्ध धर्म संघ जूम पुचःमार्फत संकलित सहयोग रकममध्ये विश्व शान्ति विहार र थाइ धर्मदूतबाट त्रिशूलीमा भएको राहत वितरण कार्यक्रममा तथा सम्मादिट्ठि पुचःबाट रसुवामा गरिएको राहत वितरण कार्यक्रममा समेत सहभागिता जनाइएको भिक्षु बोधिज्ञान महास्थविरले जानकारी दिएका छन्।

राहत अभियानको नेतृत्व गरिरहेका अखिल नेपाल भिक्षु महासंघका कार्यकारी सदस्य भिक्षु उत्तमका अनुसार, भदौ १० गते आएको विनाशकारी भोटेकोशी बाढीका कारण त्रिशूलीसहित आसपासका क्षेत्रमा ठूलो क्षति पुगेको थियो। बाढीका कारण सडक तथा पुलहरू बगेर आवागमन अवरुद्ध भएपछि राहत टोलीले लामो वैकल्पिक बाटो प्रयोग गर्दै करिब ६ देखि ९ घण्टाको यात्रा गरेर प्रभावित क्षेत्रमा पुगेर राहत सामग्री वितरण गरेको भिक्षु उत्तमले बताए।

राहत वितरणका क्रममा पीडित परिवारको मुहारमा देखिएको खुसी र मुस्कानले आफूहरूलाई थप उत्साहित बनाएको राहत टोलीले जनाएको छ।

त्रिशूली बाढीमा ज्यान गुमाएकाहरूको सुगतिको कामना तथा बाढी प्रभावितहरूको जीवनमा साहस र शान्तिको कामना गर्दै भिक्षु संघले मैत्री सूत्र पाठ गरेको थियो।

राहत अभियानमा सहयोग गर्ने सम्पूर्ण दाता, बौद्ध संघ–संस्था तथा सहयोगी महानुभावप्रति आयोजकले आभार व्यक्त गर्दै आगामी दिनमा पनि विपद् प्रभावित समुदायका लागि मानवीय सहयोग जारी राख्ने प्रतिबद्धता जनाएको छ।

VIDEO LINK