त्रिशूली करिडोर पुनर्निर्माणमा अन्तर्राष्ट्रिय सहयोग जुटाउने UNOPS को प्रतिबद्धता

काठमाडौं / ऊर्जा, जलस्रोत तथा सिँचाइ मन्त्री विराज भक्त श्रेष्ठले नेपालले हालै भोगेको भोटेकोशीको विनाशकारी बाढी सम्पूर्ण विश्वकै लागि जलवायु परिवर्तनको गम्भीर चेतावनी र महत्वपूर्ण पाठ भएको बताएका छन्।

मन्त्री श्रेष्ठले आज मन्त्रालयमा संयुक्त राष्ट्रसंघीय परियोजना सेवा कार्यालय (UNOPS) का एसिया–प्रशान्त क्षेत्रीय निर्देशक सारा नेट्जरसहितको उच्चस्तरीय विज्ञ टोलीसँग भेटवार्ता गर्दै भोटेकोशी बाढीबाट भएको क्षति तथा भविष्यको पुनर्निर्माण रणनीतिबारे गम्भीर छलफल गरेका हुन्।

भेटका क्रममा भोटेकोशी क्षेत्रमा भएको मानवीय, भौतिक तथा पूर्वाधार क्षतिको समीक्षा गर्नुका साथै भविष्यमा यस्ता विपद्को जोखिम न्यूनीकरण गर्न अपनाउनुपर्ने दीर्घकालीन रणनीतिबारे समेत छलफल भएको मन्त्री श्रेष्ठको सचिवालयले जनाएको छ।

UNOPS को विज्ञ टोलीले नेपालका आगामी विकास निर्माणका योजनामा ‘Build Back Better’ अर्थात् विपद्–प्रतिरोधी तथा अझ सुरक्षित पूर्वाधार निर्माणको अवधारणा अवलम्बन गर्न सुझाव दिएको छ।

त्यसैगरी, बाढीबाट प्रभावित त्रिशूली करिडोरको एकीकृत तथा दिगो पुनर्निर्माण योजना निर्माणका लागि आवश्यक प्राविधिक तथा अन्तर्राष्ट्रिय सहयोग जुटाउन UNOPS टोलीले प्रतिबद्धता जनाएको बताइएको छ।

मन्त्री श्रेष्ठले नेपालका जलस्रोत तथा पूर्वाधारलाई जलवायुमैत्री, सुरक्षित र विपद् प्रतिरोधी बनाउने अभियानमा सरकार प्रतिबद्ध रहेको बताएका छन्।

“नेपालले भोगेको यो विपद् केवल नेपालको समस्या मात्र होइन, विश्वव्यापी जलवायु परिवर्तनले निम्त्याउन सक्ने जोखिमको एउटा गम्भीर संकेत पनि हो,” मन्त्री श्रेष्ठको भनाइ उद्धृत गर्दै सचिवालयले जनाएको छ।

उनले एकीकृत र दिगो विकासको यात्रामा अन्तर्राष्ट्रिय समुदायबाट प्राप्त सहयोग, प्राविधिक सहकार्य र ऐक्यबद्धताप्रति UNOPS टोलीलाई धन्यवादसमेत व्यक्त गरेका छन्।

भोटेकोशी हुँदै त्रिशूली नदी क्षेत्रमा आएको विनाशकारी बाढीपछि प्रभावित क्षेत्रको पुनर्निर्माण, सुरक्षित पूर्वाधार निर्माण तथा दीर्घकालीन विपद् व्यवस्थापनका विषयमा सरकार र अन्तर्राष्ट्रिय विकास साझेदारबीच सहकार्य बढिरहेको छ।