रसुवा–भोटेकोशी बाढीमा ज्यान गुमाएकाको चीरशान्ति र सुगतिका कामनासहित लागि रास्वपा काठमाडौंको दीपदान कार्यक्रम

काठमाडौं । राष्ट्रिय स्वतन्त्र पार्टी (रास्वपा) काठमाडौं जिल्ला समितिले रसुवा–भोटेकोशी क्षेत्रमा आएको विनाशकारी बाढीका कारण भएको मानवीय क्षतिप्रति गहिरो दुःख व्यक्त गर्दै दिवंगतहरूको चीरशान्ति तथा सुगतिको कामनासहित बौद्धनाथ परिसरमा दीपदान कार्यक्रम सम्पन्न गरेको छ।

विभिन्न धार्मिक तथा सांस्कृतिक परम्परामा दिवंगत व्यक्तिहरूको चीरशान्ति र सुगतिको कामना गर्दै दीप प्रज्ज्वलन गर्ने प्रचलन रहिआएको छ, जसलाई दीपदानका रूपमा समेत लिइन्छ। सोही मानवीय संवेदना र श्रद्धाको भावनासँग जोडिएको उक्त कार्यक्रममा बाढी तथा विपद्मा परी ज्यान गुमाएकाहरूको सम्झनामा दीप प्रज्ज्वलन गरिएको थियो।

कार्यक्रमको प्रारम्भमा दिवंगतहरूप्रति श्रद्धाञ्जली अर्पण गर्दै एक मिनेट मौनधारण गरिएको थियो। साथै, बाढीबाट घाइते भएकाहरूको शीघ्र स्वास्थ्यलाभ तथा प्रभावित नागरिकहरूको स्वास्थ्य र सुरक्षाको कामना समेत गरिएको थियो।

दीपदान कार्यक्रममा ऊर्जा, जलस्रोत तथा सिँचाइ मन्त्री विराजभक्त श्रेष्ठ, रास्वपा काठमाडौं जिल्ला सभापति राजा शाक्य, काठमाडौं क्षेत्रनं. ३ का प्रतिनिधिसभा सदस्य राजुनाथ पाण्डे, काठमाडौं क्षेत्र नं. २ का प्रतिनिधिसभा सदस्य सुनिल के.सी. तथा श्री बौद्धनाथ क्षेत्र विकास समितिका अध्यक्ष सुरेन्द्र बज्राचार्यलगायतको उपस्थिति रहेको थियो।

त्यसैगरी, कार्यक्रममा रास्वपाका विभिन्न तहका नेता तथा कार्यकर्ता, स्थानीयवासी एवं उल्लेख्य संख्यामा सर्वसाधारणको सहभागिता रहेको थियो।

विभिन्न सामाजिक तथा मानवीय गतिविधिमा सक्रिय राष्ट्रिय स्वतन्त्र पार्टी काठमाडौं जिल्ला समितिले विपद्बाट प्रभावित नागरिकप्रति ऐक्यबद्धता र मानवीय संवेदना प्रकट गर्ने उद्देश्यले उक्त कार्यक्रम आयोजना गरेको जनाएको छ।

रसुवा–भोटेकोशी बाढीबाट ज्यान गुमाएकाहरूप्रति श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गर्ने उद्देश्यले आयोजित उक्त दीपदान कार्यक्रम राष्ट्रिय स्वतन्त्र पार्टी काठमाडौं जिल्ला समितिको आयोजनामा तथा काठमाडौं क्षेत्र नं. ३ को संयोजनमा सम्पन्न भएको हो।