लुम्बिनीमा शान्ति तथा सुगति पाठ

-दीपक चौधरी

असोज २६ गते,लुम्बिनी / नेपालमा शान्ति सुरक्षा, जेन्जी आन्दोलनमा शहिद भएकाहरुको सुगति र घाइते भएकाहरुको श्रीघ्र स्वास्थ्य लाभको कामना गर्दै बुद्ध जन्मभूमि लुम्बिनीमा शान्ति तथा सुगतिकोे पाठ भएको छ । लुम्बिनीस्थित विभिन्न विहारका भिक्षु भिक्षुनीहरुद्वारा पाठ भएको थियो । पाठ कार्यक्रममा लुम्बिनीस्थित थेरवाद विहार, श्रीलंकन विहार, राजकीय थाइ विहार, नेपाली विहार, चाइनिज विहार र अन्य महायानी विहारका भिक्षु तथा भिक्षुणीहरुको सहभागिता रहेको थियो ।
कार्यक्रमका आयोजक लुम्बिनी बौद्ध विश्वविद्यालयका डीन डा. माणिकरत्न शाक्यले जेन्जीको आन्दोलनले देशमा युगान्तकारी परिवर्तन भएको बताउँदै यस परिवर्तनका लागि आफ्नो जीवनको समेत बलिदान दिने युवा भाइवहिनीहरुप्रति हार्दिक श्रद्धाञ्जली ब्यक्त गर्दै उनीहरुको सुगतिको कामना गरे । “शहीदहरुको अमूल्य योगदानलाई जनताले सधैं सम्झिरहने छन् ” डीन डा. शाक्यले बताए ।
जेन्जीको आन्दोलनमा घाइते भई उपचारार्थ सवैको शीघ्र स्वास्थ्य लाभको पनि कामना गर्दै उनीहरुको उपचारको लागि नेपाल सरकार लगायत सबैले सहयोग गर्नुपर्ने वताए ।
हाल नेपाल विषम परिस्थितिमा रहेको, भोलि के होला भनी जनताहरु त्रसित छन् त्यसैले शान्तिको कामनार्थ पनि लुम्बिनीमा यो कार्यक्रम गरिएको हो ।
कार्यक्रममा पुरातत्वविद् वसन्त विडारीले जेन्जी आन्दोलनमा दिवंगत भएका सहीदहरुप्रति श्रद्धाञ्जली अर्पण गर्दै उनीहरुको जीवनदान भविष्यमा ऐतिहासिक हुने बताए । त्यस्तै भिक्षु सिरी वजिरले पनि अहिलेको विषम परिस्थिति र दुखद घडी सवैले मैत्री एवं करुणा भाव जगाउनु पर्ने बताउँदै लुम्बिनीमा गरिएको यस कार्यको पुण्यानुभावले नेपालमा शान्ति होस भनी कामना गरे ।