महानगरका संस्थापक मेयर पिएल सिंहको निधन, शोकमा आज काठमाडौँ महानगरपालिकामा बिदा

काठमाडौँ/काठमाडौँ महानगरपालिकाका संस्थापक मेयर पिएल सिंहको निधनमा शोक मनाउ गर्दै महानगर पालिकाले आज (पुस १ गते) शोक बिदा दिएको छ । आज बिहान संस्थापक मेयर सिंहको निधन भएपछि महानगरले सूचना प्रकाशन गर्दै बिदा दिने निर्णय गरेको हो । महानगरले अत्यावश्यक सेवाबाहेकका अन्य सबै सेवा बन्द हुने समेत जनाएको छ ।सिंहले वि.सं. २०५२ मङ्सिर २९ गते काठमाडौं महानगरपालिका घोषणा गर्नु भएको र महानगरलाई योगदान पुर्‍याएको भन्दै उहाँको सम्मानका लागि आज बिदा दिने गरी महानगरपालिका र मातहतका कार्यालयहरूमा जानकारी दिएको छ ।
लामो समयदेखि उपचाररत पिएल सिंह हक्की स्वभावका मेयर थिए ।उनको कार्यकालमा काठमाडौं महानगरले धेरै उपलब्धि हासिल गरेको थियो भने बिदेशका विभिन्न नगरहरुसँग सम्बन्ध बढाउने र आर्थिक र प्राविधिक सहयोग आदानप्रदानमा प्रसंशायोग्य कामहरु भएका थिए । जीवनको लामो समय प्रजातान्त्रिक संघर्षमा बिताएका उनी लौह पुरुष गणेशमान सिंहका प्रियपात्र थिए ।महानगर पालिकाको कला संस्कृतिमा महानगरले लगानी गर्नुपर्छ भन्ने धारणा राख्ने उनका कार्यको संस्कृतिप्रेमिहरुले भुलेका छैनन् । “स्वस्थ हराभरा काठमाडौं” जस्ता उनका नारा आज पनि उत्तिकै आवश्यक रहेको छ ।लोकतान्त्रिक आन्दोलनको अथक र निष्ठावान सेनानी, नेपाली कांग्रेसका नेता, पूर्वमन्त्री रहनु भएका पि.एल. सिंह काठमाडौं महानगरपालिकाका मेयरका रूपमा २०४९ देखि २०५४ सालसम्मको कार्यरत थिए । वि.स. १९९७ मा जन्मनु भएका उहाँको ८५ वर्ष उमेरमा आज सोमबार,पुस १ गते बिहान दु:खद निधन भएको हो ।
२०६३ देखि नेपाली कांग्रेससँग गम्भीर सैद्धान्तिक विमति भएपछि सक्रिय राजनीतिबाट टाढा रहँदै आएका थिए । आजीवन अविवाहित नेपाली कांग्रेस र लोकतान्त्रिक आन्दोलनमा उहाँको देन असाधारण छ।

मेयर बालेन्द्र साह संस्थापक मेयरको स्वास्थ्य अवस्था बुझ्ने क्रममा