देय् दबूया स्वीक्वःगु बुसादँय् भाषा, कला, साहित्य, संस्कृति योगदान बियादीपिं हन

येँ(नेपालभाषा टाइम्स)- नेवाःतय् राष्ट्रिय संगठन नेवाः देय् दबूया स्वीक्वःगु बुसादँ वंगु मंगलवाः थीथी व्यक्तिपिंत थीथी सिरपाः व सम्मान लःल्हासें हन । थनया खुसिबुँइ च्वंगु नेपाः ब्यांक्वेटय् जूगु देय् दबूया स्वीक्वःगु बुसादँय् भाषा, कला, साहित्य, लिपि संस्कृतिया इलय् ज्वःमदुगु योगदान बियादीपिं व्यक्ति व संघसंस्थायात छगू लख तका दांया थीथी सिरपाः लःल्हाःगु खःसा भाषा व कासा ख्यलय् अन्तर्राष्ट्रियस्तरय् योगदान बियादीपिंत हनेज्या याःगु खः ।

देय् दबूया नायः पवित्र वज्राचार्यया सभापतित्वय् जूगु ज्याझ्वलय् बागमति प्रदेशया कृषि तथा पशुपछि विकास मन्त्री प्रकाश श्रेष्ठ मूपाहां, बागमति प्रदेशया सामाजिक विकास मन्त्री हरिप्रभा खड्गी श्रेष्ठ विशेष पाहां व येँ महानगरपालिकाया उपप्रमुख सुनिता डंगोल पाहांकथं झायादीगु खः । देय् दबूया नायः वज्राचार्यं लसकुस यानादिसें मूपाहां बागमति प्रदेशया मन्त्री श्रेष्ठयात नेवाः परम्पराकथं बेतालि चिकाः लसकुस यानादीगु खः ।
ज्याझ्वलय् नेपाल संवत्या तिथियात कोडिङ डिकोडिङया माध्यमं कम्प्युरट प्रणालीइ दुथ्याकेत मू भूमिका म्हितादीम्ह प्रा.डा. ई भगवानदास मानन्धरयात नारायणदेवी तीर्थ समाज सेवा सिरपाः लःल्हाःगु खः । अथे हे गिरिधरलाल नेपालभाषा सेवा सिरपाः नेपाल लिपिया प्रचारलिसें खोज अनुसन्धान व अन्वेषण याना वयाच्वनादीम्ह वरिष्ठ अन्वेषक काशिनाथ तमोटयात लःल्हाःगु खःसा नारायण देवी तीर्थ व्यवसायी प्रोत्साहन सिरपाः थसिया परम्परागत सुकू व्यवसाय याना वयाच्वंगुयात लःल्हाःगु खः । थुपिं स्वंगुलिं सिरपाः म्हतिं छगू छगू लख तका दांया खः ।

थुकथं हे ज्याझ्वलय् बागमति प्रदेशय् नेपालभाषा व तामांग भाय्यात सरकारी कामकाजी भाय्या रुपय् लागू यायेत महत्वपूर्ण भूमिका म्हितादीम्ह बागमति प्रदेशया सांसदलिसें पुलांम्ह मन्त्री शैलेन्द्रमान वज्राचार्य, नकतिनि क्वचाःगु पेरिसय् पारा ओलम्पिकय् ऐतिहासिक कास्य पदक त्याकादीम्ह पलेसा गोवद्र्धन श्रेष्ठ, अन्तर्राष्ट्रिय कराते कासाय् पदक त्याकादीम्ह केदारेश्वरमान स्थापित, गुगलय् नेपालभाषा अनुवाद थुथ्याकेत महत्वपूर्ण भूमिका म्हिता वयाच्वंगु वल्र्ड नेवाः अर्गनाइजेनसयात नं हनेज्या याःगु खः ।

पुरस्कृत व्यक्तित्वपिं व सम्मानित व्यक्तित्वपिंत देय् दबूया नायः वज्राचार्यं बेतालिं चिकाः लुमन्ति चिं लःल्हानादीगु खःसा विशेष पाहां बागमति प्रदेशया सामाजिक विकास मन्त्री हरिप्रभा खड्गी श्रेष्ठ व देय् दबूया संरक्षक मल्ल के. सुन्दरं दोसल्ला न्ययेकादीगु खः । अथे हे मूपाहांपाखें हनापौ लःल्हाःगु खःसा पुरस्कृति व्यक्तित्वपिंत दाताया प्रतिनिधिपिंसं दां लःल्हानादीगु खः ।

ज्याझ्वलय् मूपाहां बागमति प्रदेशया कृषि तथा पशुपछि विकास मन्त्री प्रकाश श्रेष्ठ, सामाजिक विकास मन्त्री हरिप्रभा खड्गी श्रेष्ठ, येँ महानगर उपप्रमुख सुनिता डंगोल, पारा ओलम्पिक पदक विजेता पलेसा गोवद्र्धन श्रेष्ठ, देय् दबूया संरक्षक नेवाः न्ह्यलुवा मल्ल के सुुन्दर लगायतं नुगःखँ तयादीगु खः । ज्याझ्वः दथुइ दथुइ थीथी कलाकरं चचा प्याखं, म्येँ, हुला प्याखं नं न्ह्यब्वःगु खः । source : Nepal Bhasa Times